A chegada de 2021 concidiu no territorio galego cun episodio de baixas temperaturas e precipitación que, en boa parte do interior, caeron en forma de neve. Así, despois de nevaradas xa importantes en zonas altas durante a fin de semana, as serras orientais e outros puntos elevados amenceron cubertos dunha capa branca. É a antesala dun temporal que se prolongará durante os vindeiros días, e que será máis intenso no centro e leste da península ibérica, con importantes acumulacións de neve.
Así, a entrada dunha baixa desde o Golfo de Biscaia, cargada con aire moi frío, está a provocar temperaturas mínimas de ata -6,5ºC en Cabeza de Manzaneda ou Lardeira (Carballeda de Valdeorras) e acumulacións importantes de neve nas serras do Macizo Central Ourensán, O Courel, Ancares, Xistral ou Faro. Este escenario levou a MeteoGalicia a activar o nivel amarelo por baixas temperaturas en boa parte da provincia de Ourense e a montaña de Lugo, xa que se poderán volver a acadar na madrugada do luns ao martes os -6ºC.
Con todo, Galicia non levará a peor parte do primeiro temporal de neve de 2021 na península. O martes, a zona noroccidental quedará nunha zona intermedia entre altas e baixas presións. Manterase o frío pero, a medida que avance o día e se disipen as néboas, os ceos estarán despexados no sur do territorio galego, e con nubes e claros no norte. Porén, en zonas altas da Coruña e Lugo, onde poden caer chubascos illados, poderá verse aínda neve por riba dos 500 metros. Manterase, iso si, unha sensación xeral de frío, xa que só se superarán os 10ºC de máxima en puntos do suroeste do país.
Bo día! Comezamos unha semana marcada en #Galicia pola presenza de aire frío e inestabilidade. Arestora a cota de neve móvese nos 400-500 metros e seguen entrando chuvascos dende o noroeste⚠️❄️como vemos na animación das últimas horas do radar. Tenderán a desaparecer pola tarde. pic.twitter.com/rn2AdUbFWR
— MeteoGalicia (@MeteoGalicia) January 4, 2021
