O CSIC acaba de nomear o enxeñeiro de montes Rafael Zas Arregui novo director da Misión Biolóxica de Galicia (MBG). O investigador leva provisionalmente no cargo dende xullo de 2022, despois de que Elena Cartea González fose designada vicepresidenta adxunta de Áreas Científico-Técnicas do CSIC. Zas Arregui, que é natural de Santiago, desenvolve o seu labor investigador na MBG dende 2008, dende onde dirixe o grupo Xenética e Ecoloxía Forestal. Neste novo cargo directivo acompañarano Pablo Velasco como vicedirector na sede de Pontevedra e Serafín González Prieto na de Santiago.
Zas Arregui (Santiago, 1971) é enxeñeiro (1996) e doutor enxeñeiro de montes (2001) pola Universidade Politécnica de Madrid. Realizou a súa tese doutoral entre esta universidade e o Centro de Investigacións Forestais de Lourizán, onde iniciou a súa estaba posdoutoral, que continuou no SCION, en Nova Zelandia. En 2008 incorporouse ao CSIC como científico titular na MBG, onde dende esa data dirixe o grupo de Xenética e Ecoloxía Forestal, cuxa principal liña de investigación é a mellora do coñecemento das bases xenéticas e ecolóxicas da resistencia das árbores forestais fronte aos seus inimigos biolóxicos. En 2017 promocionou a investigador científico.
Ademais, foi investigador principal de 15 proxectos de investigación de convocatorias competitivas e outros tantos contratos con entidades públicas e privadas. É coautor de 100 artigos en revistas científicas e dirixiu cinco teses doutorais. Participa á súa vez en proxectos de divulgación e actividades de xestión científica.
“Un centro de vangarda”
“O principal reto do proxecto directivo é, tal e como se recolle no plan estratétixo da MBG, posicionar este instituto do CSIC como un centro de vangarda, líder e de referencia na investigación de ámbito agrario, forestal e ambiental tanto a nivel autonómico como nacional e internacional. Pretendemos converter a MBG nun centro visible, atractivo e ilusionante para o persoal investigador mozo nacional e estranxeiro. Aínda que son, sen dúbida, retos ambiciosos e de alto calado, os recentes cambios no instituto coa integración das dúas sedes (Santiago e Pontevedra) e a incorporación dunha boa e variada cantidade de investigadores, sitúan o centro nunha posición privilexiada para acadalos”, avanza Zas Arregui.
“Na miña opinión, a MBG atópase nestes momentos nun punto de inflexión pasando de ser un centro pequeno, periférico e moi focalizado nunhas poucas liñas de investigación, a ser un centro de considerable tamaño, peso e prestixio nunha ampla e variada colección de liñas de traballo nas áreas de ciencias agrarias, ambientais e forestais”, engade.
