Ciencia en feminino, o ciclo de charlas e mesas redondas organizado por Gciencia en colaboración coa Deputación de Pontevedra, arrinca a súa nova edición. Composto por catro actividades que se desenvolverán ao longo da segunda quincena de marzo e a primeira de abril, a sesión inaugural versa sobre as vocacións científicas e como se manteñen ao longo do tempo pese aos obstáculos que as mulleres seguen a ter na ciencia.
Nesta segunda sesión na que abordaremos a Ciencia e o emprendemento das mulleres entrevistamos a Catalina Fernández de Ana Portela, doutora en Investigación Clínica en Oncoloxía pola Universidade de Santiago e directora xeral de Hifas da Terra, unha empresa biotecnolóxica con sede en Pontevedra centrada no desenvolvemento de nutracéuticos a partir de fungos medicinais. As principais áreas de investigación da compañía galega, fundada pola propia Catalina Fernández hai máis de dúas décadas son os estudos sobre cancro, saúde cerebral, saúde cardiovascular e enfermidades autoinmunes. Con ela falamos do 25 aniversario de Hifas da Terra, a dificultade de defender a importancia na ciencia dos fungos así como o fomento da igualdade de xénero dende a empresa.
