Únete á nosa canle de Whatsapp
Coñecer os efectos que sobre o medio mariño está a provocar a actividade humana con especial atención ás especies invasoras ou á acidificación que sofren os océanos está ao alcance de calquera persoa que na vindeiras semanas decida achegarse ás praias de Cedeira, Marín, A Illa de Arousa e Cangas. O programa de divulgación científica Mergúllate no Océano de Campus do Mar segue o seu percorrido tras comezar a pasada ponte na praia de Samil en Vigo, onde máis de 1500 persoas coñeceron da man de profesionais da investigación algúns dos secretos que agocha e as ameazas que asexan ao medio mariño.
Así, tras recalar os días 23, 24 e 25 de xullo na praia viguesa, o programa continuará percorrido a vindeira fin de semana pola praia da Magdalena na localidade coruñesa de Cedeira, onde se desenvolverán os oito obradoiros divulgativos mariños, que integran Mergúllate no Océano, e nos que “a través de experimentos sinxelos, simulacións e xogos os e as participantes poden ir descubrindo curiosidades sobre os mares e océanos, así como aprender e obter coñecementos específicos relacionados estreitamente coa investigación que se está a desenvolver nas universidades e centros que integran o Campus do Mar”, explica Jorge de los Bueis, coordinador do proxecto.
Persoal especializado en divulgación científica, con titulación universitaria e experiencia na transmisión de coñecementos, é o encargado de impartir os obradoiros nos que as persoas que a eles se acheguen poderán descubrir desde como se forma unha onda a de onde vén o peixe que consumimos. Mogor en Marín, Area da Secada na Illa de Arousa e Rodeira en Cangas son os areais que completan este verán o percorrido dos obradoiros oceanográficos organizados por Campus do Mar.
