Luns 4 Marzo 2024

GCiencia e a Universidade de Vigo estrean o podcast ‘Ciencia de ida e volta’

O programa estréase este xoves con motivo do Día Mundial da Saúde e constará de nove episodios

GCiencia e a Universidade de Vigo estrean este xoves o podcast Ciencia de Ida e Volta, un programa diario de nove episodios que estarán dedicados aos días mundiais da Saúde e dos Océanos. Os contidos ofreceranse en distintas plataformas de podcast e nas webs de GCiencia e da UVigo.

O primeiras catro entregas —os días 7, 8, 9 e 10 de abril— dedicaranse ao Día Mundial da Saúde, que se celebra este mesmo xoves. Trátase dunha serie de entrevistas dirixidas pola xornalista Laura Veiga, de GCiencia, con distintos investigadores da Universidade de Vigo, para que expliquen o seu traballo vinculado ao ámbito das enfermidades cardiovasculares, que supoñen na actualidade a principal causa de morte no noso país.

Publicidade

Os invitados ao podcast serán Ramón Hermida, que forma parte do Laboratorio de Bioenxeñaría e Cronobioloxía de atlanTTic; a catedrática do grupo de Xenómica e Biomedicina do Cinbio, Diana Valverde; o investigador do Laboratorio de Informática Aplicada Víctor Mondelo, e os investigadores do grupo REMOSS Roberto Barcala e Felipe Fernández.

Unidade de Cultura Científica

A Unidade de Cultura Científica da UVigo (UCC+I) e GCiencia únense así para abordar o Día Mundial da Saúde e as enfermidades cardiovasculares dende múltiples perspectivas, tanto desde a área de informática, como a bioloxía, a bioenxeñaría e o salvamento. E fano dunha forma dinámica e amena, para que a sociedade poida coñecer a achega do persoal investigador da Universidade de Vigo de cara a mermar esta lacra.

A primeira desas entrevistas terá como invitados a Barcala e Fernández, cunha liña de investigación vinculada á reanimación cardiopulmonar con varias teses publicadas ao respecto, que ofrecen unha visión diferente ás doutros grupos de investigación. O venres tócalle o turno a Diana Valverde, que realiza diferentes estudos sobre a hipertensión arterial pulmonar, unha enfermidade que xera engrosamento do ventrículo e, a posteriori, isto podería derivar nunha parada cardíaca.

Control da presión arterial

O podcast terá o seu seguinte capítulo o sábado cunha entrevista con Ramón Hermida, quen traballa no desenvolvemento de diversas liñas de investigación xunto co seu equipo do Laboratorio de Bioenxeñaría e Cronobioloxía. Entre elas está o estudo Thadeus (Tratamento de Hipertensión Arterial Durante o Sono), que ten como obxectivo valorar prospectivamente o efecto sobre o risco de eventos cardiovasculares, metabólicos e renais fatais e non fatais do control da presión arterial durante o sono. O domingo pechará a primeira parte da serie Víctor Mondelo, creador dun sistema informático de apoio á diagnose de electrocardiogramas que facilita o traballo do persoal sanitario na toma de decisións.

Os seguintes cinco episodios do podcast Ciencia de Ida e Volta emitiranse con motivo da celebración, o 8 de xuño, do Día Mundial dos Océanos. O proxecto, liderado pola Unidade de Cultura Científica da UVigo, realízase coa  coa colaboración da Fundación Española para la Ciencia y la Tecnología, do Ministerio de Ciencia e Innovación.

1 comentario

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

00:05:02

Poñer a roupa ao clareo do Sol, funciona?

É unha técnica tradicional para branquear a roupa que seguimos empregando hoxe. A ciencia confirma a eficacia dos raios solares como o mellor desinfectante natural
00:04:28

Comer ovos dispara o noso colesterol?

Grazas aos avances científicos hoxe sabemos que esta relación non é máis que un mito. Iso si, outros factores como os hereditarios, poden forzarnos a reducir o consumo deste alimento
00:04:50

Teñen os mosquitos as súas cores de predilección?  

Ir vestidos de negro nun día de calor pode aumentar as probabilidades de que nos pique un mosquito, pero será o noso olor corporal o que determine a nosa condición de vítima
00:04:54

É o limón o remedio contra todos os males?

O froito do limoeiro forma parte da nosa dieta e da nosa farmacia doméstica desde hai séculos, pero o avance da ciencia négalle hoxe os seus poderes de superalimento