O fotógrafo galego Julio Castro volve impactar ao mundo enteiro coas súas novas panorámicas, aumentando así o seu palmarés nun dos concursos de fotografía máis importantes a nivel internacional, o Trierenberg Super Circuit, coñecido como o ‘Oscar da fotografía’, e no que xa fora premiado en 2018. Traballando como guía fotográfico para unha empresa de viaxes, Castro acadou o premio á mellor fotografía de paisaxe do concurso e medalla de ouro en panorámicas.
Nesta ocasión, o fotógrafo viaxou a Namibia para capturar o arco natural de Spitzkoppe. A imaxe chamada ‘O arco’ foi tomada no momento xusto no que o sol se puña entre as montañas, proxectando unha potente luz dourada sobre a roca vermella. “Recorda indubidablemente ás paisaxes que podemos atopar no suroeste americano”, admite.
A segunda fotografía, ‘Noite nos Dolomitas’, levou ao fotógrafo ata o Parque Natural das Tres Cimas de Lavaredo, nos Dolomitas Italianos. Nesta imaxe, Castro consegue deter unha sorprendente escena na que a Vía Láctea cae xunto ás tres cimas de Lavaredo, no centro da panorámica, no que tamén se atopa unha persoa iluminando cunha lanterna contra o horizonte. Por diante, pódese ver o refuxio de montaña de Locatelli, á esquerda, e unha pequena capela localizada cara á dereita.
A afección de Julio Castro á astrofotografía xa fora anteriormente premiada por diferentes concursos e certames como son o International Photography Award, Memorial María Luísa, Epson Pano Awards, Sony World Photography Awards, entre outros.
