Este mércores cúmprense 100 anos exactos dunha observación que provocou que o nome de Albert Einstein sexa aínda máis coñecido por todos hoxe en día. Aquel día, o 29 de maio de 1919, o científico “ensombreceu” a Isaac Newton e validou con datos reais, por primeira vez, unha das predicións da Teoría da Relatividade Xeral.
Para conmemorar este fito, o físico José Edelstein, profesor da Universidade de Santiago e investigador do Instituto Galego de Física de Altas Enerxías (IGFAE), gran coñecedor da figura de Einstein, ofrece unha charla ás 19.30 horas no centro Abanca de Santiago de Compostela (Praza de Cervantes), na que explicará as implicacións científicas do achado, relatando como Newton quedou eclipsado definitivamente por Einstein, quen se converteu na celebridade mundial que perdura xusto un século despois.
Aquel día do que se cumpren 100 anos estaba prevista unha eclipse total de Sol que sería visible desde Brasil e África, segundo predicían as ecuacións de Isaac Newton. A súa lei da Gravitación Universal dominaba a física do momento, pero entraba en conflito coa Teoría da Relatividade Xeral de Albert Einstein, que propoñía que a luz desviaba a súa traxectoria ata o dobre ante a presenza dun obxecto moi masivo debido á curvatura do espazo. Ante a falta dunha evidencia experimental, o astrónomo británico Arthur Stanley Eddington liderou un experimento: utilizar a eclipse de 1919 para fotografar as estrelas que se atopaban ao redor do disco solar antes e durante o evento e así comprobar se se producía a deflexión ou desviación da súa luz ao pasar preto do Sol.
Grazas ao escurecemento do ceo durante a totalidade da eclipse, os dous equipos ingleses que formaron a expedición científica puideron comprobar meses despois, ao revelar as placas fotográficas, que a posición dalgunhas desas estrelas se alterara. A súa luz, no canto de viaxar en liña recta, desviouse lixeiramente ao pasar preto do campo gravitacional do Sol.
