O presidente do Goberno, Pedro Sánchez, anunciou este mércores, durante a inauguración do primeiro Cumio Internacional contra o Odio, a posta en marcha dunha nova ferramenta destinada a rastrexar o discurso de odio nas redes sociais. A plataforma, denominada Hodio, analiza a presenza de mensaxes de odio e de polarización nas redes máis utilizadas en España —Instagram, TikTok, X, YouTube e Facebook— e elabora un ranking público e transparente que compara o nivel de exposición a este tipo de contido entre plataformas. A iniciativa desenvólvese a través do Observatorio Español do Racismo e a Xenofobia (OBERAXE).
A ferramenta mide tanto a prevalencia do discurso de odio como a amplificación deste tipo de contidos nas diferentes redes sociais. Segundo explican dende o Ministerio de Inclusión, Seguridade Social e Migracións, Hodio utiliza un sistema mixto de análises que combina técnicas cuantitativas e intelixencia artificial para procesar grandes volumes de contido público. Ao mesmo tempo, incorpora a revisión humana para garantir a precisión e a coherencia das análises. “As mensaxes detectadas como potencialmente polarizantes ou ofensivas revísanse para garantir unha análise rigurosa e fiable”, sinala a información publicada na páxina web.
A decisión sobre que contidos son odio baséase en criterios académicos e estándares internacionais, ademais da combinación de sistemas automatizados e revisión por parte de expertos. A partir destes datos, o proxecto prevé elaborar informes semestrais para seguir a evolución de cada rede social.
Dende o Ministerio subliñan a importancia de medir o odio en espazos cotiáns como as redes sociais. Segundo indican, “o discurso de odio e a polarización deterioran a convivencia democrática e o debate público, afectan ao benestar social e a saúde, especialmente dos colectivos máis vulnerables”. En definitiva, a iniciativa busca contribuír á protección dos usuarios e á creación de contornas dixitais máis seguras.
