O proxecto ORALREGENERIX – Rexeneración na clínica de tecido oral mediante o uso dun sistema dun biopen portátil, impulsado desde o Centro Interdisciplinar de Química e Bioloxía (CICA) da Universidade da Coruña, vén de obter un financiamento superior aos 400.000 euros a través do programa IGNICIA Proba de Concepto, promovido pola Axencia Galega de Innovación (GAIN). A axuda permitirá avaliar e desenvolver a vía de comercialización dun biopen portátil que servirá para a rexeneración de tecidos bucais, aspirando a liderar unha nova xeración de terapias rexenerativas en odontoloxía.
Esta iniciativa, liderada desde o grupo Advanced Biofab, busca crear una spin-off tecnolóxica dedicada ao desenvolvemento de solucións biomédicas innovadoras. O seu obxectivo é ofrecer novas alternativas terapéuticas que permitan reparar de forma máis eficaz os danos en enxiva e óso causados por enfermidades, traumatismos ou intervencións cirúrxicas.
A través de tecnoloxías avanzadas de medicina rexenerativa, o proxecto aspira a mellorar a recuperación e a calidade de vida dos pacientes. Ademais, pretende impulsar a transferencia de coñecemento desde a investigación cara á práctica clínica, xerando innovación e emprego cualificado no sector biomédico.
Os investigadores Daniel Nieto e Nadina Usseglio, responsables do proxecto, presentaron onte en Santiago as principais liñas de traballo e obxectivos no marco de presentación dos IGNICIA Proba de Concepto 2025, nas que se deron a coñecer as nove iniciativas seleccionadas na convocatoria para impulsar a transferencia de coñecemento cara ao mercado.
Biofabricación avanzada
O investigador Oportunius Daniel Nieto puxo en marcha o grupo Advanced Biofab. Este equipo desenvolve liñas de investigación punteiras no ámbito da biofabricación e bioimpresión: dende a biofabricación avanzada para sistemas de enxeñaría vivos ata a biofabricación aplicada á enxeñaría de órganos e tecidos. Entre os seus traballos destaca o desenvolvemento de tecnoloxías baseadas en HOTB (Holographic Optical Tweezers Bioprinting), unha aproximación de bioimpresión óptica holográfica mediante pinzas ópticas que permite manipular e organizar células con gran precisión para a creación de estruturas biolóxicas complexas.
A obtención do proxecto IGNICIA supón un importante impulso para continuar avanzando cara a solucións sanitarias con impacto real. O CICA reforza así o seu papel como centro interdisciplinario que afronta retos globais en saúde, alimentación, novos materiais e medio ambiente baixo o principio One Health, que conecta saúde humana, animal e ecosistémica.
