Únete á nosa canle de Whatsapp
Este xoves, 1 de decembro, na 17ª Sesión Intergobernamental da UNESCO, que se celebra en Rabat (Marrocos) vaise proclamar a incorporación da Asociación Cultural e Pedagóxica galega Ponte…nas ondas! como modelo de boas prácticas co Patrimonio Cultural Inmaterialda no rexistro da UNESCO.
XVII Sesión Intergobernamental da UNESCO
O último informe da proposta, publicado recentemente, foi ditaminado como favorábel por parte do órgano avaliador, e destacou e valorou a calidade do expediente presentado. Ademais, recoñeceu o traballo realizado pola asociación ao longo destes 27 anos, o que posibilitou a súa entrada e inscrición.
Un total de catro candidaturas internacionais, soamente, serán abordadas deste foro. Deste xeito, o ingreso de Ponte…nas ondas! é o primeiro para Portugal e Galicia e, por conseguinte, estes territorios irmáns en lingua e cultura ofrecerán á cidadanía un modelo que aspira a ser incluído pola UNESCO no seu Rexistro de Boas Prácticas de Salvagarda, na categoría de Patrimonio Cultural Inmaterial.
A súa vez, a corporación solicitou aos centros educativos galegos e portugueses que apoien a candidatura. Para iso, a asociación ofreceu aos centros de ensino materiais pedagóxicos, dispoñibles nos seus sitios web. Así, entre as actividades dispoñibles, atoparíase a elaboración dun mural, a gravación dun programa de radio ou vídeo especial sobre Ponte…nas ondas! ou a retransmisión radiofónica dunha peza súa de entre varias que suxiren.
A sesión deste xoves poderá seguirse a través da web da Unesco, así como tamén mediante a páxina da asociación PTO, que retransmitirá en directo o veredicto da Organización das Nacións Unidas para a Educación, Ciencia e Cultura.
Con todo, o XVII Comité Intergobernamental da UNESCO comunicará a decisión final a finais do mes de decembro.
Que é Ponte…nas ondas?
Ponte…nas Ondas! é unha Asociación Cultural e Pedagóxica que, dende 1995, realiza actividades educativas e culturais en Galicia e no Norte de Portugal. Unha actividade na que participan escolas de Primaria e Secundaria de ambas marxes do río Miño.
A súa orixe remóntase a un día de radio que uniu escolas veciñas dos límites do río Miño para celebrar, dende os centros, o feito histórico da inauguración dunha ponte física entre as localidades de Salvaterra de Miño e Monção. Así, un grupo de 16 escolas fundaron unha “ponte de comunicación” a través dunha emisión de radio, que durou 12 horas e que foi levada a cabo por alumnas e alumnos galegos e portugueses. Tal foi o éxito da retransmisión, que a realización do programa interescolar mantívose ano tras a ano.
Entre os obxectivos da asociación están a promoción de actividades culturais e pedagóxicas e a promoción da identidade común dos dous pobos dentro dunha perspectiva xeral de integración europea e do mundo lusófono. A estes obxectivos engadíuselle en 2002 o compromiso de traballar na recuperación e difusión do Patrimonio Cultural común a galegos e portugueses.
Deste modo, a asociación leva durante case tres décadas confeccionando unha rede de persoas, escolas, universidades e institucións que buscan o recoñecemento do patrimonio inmaterial galego-portugués no mundo.
