Galicia vivirá durante a terceira fin de semana de maio un cóctel de frío e neve que afundirá as temperaturas, que acadarán valores moi baixos para esta época do ano: as máximas non superarán os 20 graos e as mínimas caerán ata os cinco. A principal responsable deste escenario é a chegada dunha masa de aire ártico marítimo que conxelará a madrugada do venres ao sábado. A ela súmase a circulación do vento do norte e unha fronte feble, que deixará chuvascos intermitentes en case todo o territorio. O domingo espérase un lixeiro aumento das temperaturas, e a partir do vindeiro martes collerá máis forza o anticiclón dos Azores, que traerá estabilidade a Galicia na recta final da vindeira semana.
Madrugadas moi frías
A masa de aire ártico provocará que a cota de neve descenda aos 1.400 metros e as temperaturas non superen os 19 graos na metade sur de Galicia e os 16 no norte. Xunto ao vento do norte e os restos dunha fronte, agárdase unha xornada moi fría para esta época do ano, con ceos nubrados e chuvascos intensos no norte. Segundo informan dende Meteogalicia, a situación será máis estable conforme avance o día, malia que os valores se manterán sen cambios significativos. Os refachos poderán ser fortes nas Rías Baixas e moderados en xeral.
A madrugada do venres ao sábado será extremadamente fría para esta época do ano, e o escenario manterase en condicións semellantes ás do día anterior. Unha fronte pouco activa cruzará Galicia pola mañá, e o anticiclón dos Azores comezará a asomar timidamente. Así, espéranse chuvascos febles, máis probables no norte e no oeste, que se irán reducindo conforme avance o día. Non haberá cambios nas temperaturas, que se manterán en valores baixos para maio e non superarán os 20 graos en ningún punto de Galicia. As mínimas estarán arredor dos cinco.
O anticiclón recupera a súa forza
O anticiclón irá gañando forza a partir do domingo, malia que aínda se rexistrarán chuvascos febles na primeira metade do día. A partir de comezos da vindeira semana, a estabilidade retomará o seu peso en Galicia. O martes espérase unha xornada de transición cara ás altas presións, que dominarán a partir do mércores. Por tanto, a segunda metade da semana espérase tempo solleiro, seco e cun importante aumento das temperaturas, que poderán rexistrar valores próximos aos 27 graos entre xoves e venres.
