Esta semana vén marcada polos contrastes. Arrinca con temperaturas propias do verán, superando os 30 graos en Ourense, e rematará con precipitacións e unha forte baixada das temperaturas. Segundo explica o meteorólogo Mario Picazo, unha gran borrasca atlántica traerá chuvia a partir do venres. A fronte entrará por Galicia e irase estendedo polo resto do territorio ata chegar ao Mediterráneo. Tamén se espera que se produza un forte descenso térmico, con máximas que non superarán os 18 graos durante a fin de semana. É dicir, unha baixada de 10 graos.
Segundo indican dende o portal Meteored, estamos a experimentar “altibaixos térmicos” —con días de calor de verán e outros nos que a temperaturas son máis suaves— propios da primavera. Dende o servizo meteorolóxico confirman o prognóstico dado por Picazo dende Eltiempo.es, con ceos pouco nubosos e temperaturas elevadas na vertente atlántica a comezos de semana, e cun cambio de tempo na segunda metade. “O mércores aumenta a nubosidade, con nubes baixas e bancos de néboa matinais no norte. As temperaturas baixarán no extremo noroccidental”, indican.
Será a partir do venres cando se noten os cambios máis bruscos. De feito, na segunda metade da xornada prevense chuvias débiles en Galicia e temperaturas que non superarán os 18 graos. Segundo Meteogalicia, entraremos nunha “área atmosférica algo máis indefinida” que provocará o descenso térmico e o aumento da nubosidade e das posibilidades de precipitación o venres e o sábado. Xa de cara á vindeira semana, tamén se espera que a influencia dunha borrasca traia máis precipitacións na segunda metade de abril.
