O tempo solleiro e as elevadas temperaturas dos últimos días dan paso ás fortes treboadas. Galicia vivirá este martes unha xornada de profunda inestabilidade a causa dunha dina situada ao oeste da península. O embolsamento de aire frío en altura, xunto a un Atlántico máis cálido do normal, provocará chuvias intensas no interior da comunidade, sobre todo pola tarde, que poden vir acompañadas de aparello eléctrico e sarabia. De feito, Meteogalicia acende a alerta laranxa no interior da Coruña e no centro de Lugo por fortes tormentas entre as 18 e as 21 horas. O aviso amarelo tamén estará activo por treboadas nas provincias de Ourense e Lugo, e no interior e Miño de Pontevedra. A inestabilidade continuará durante o mércores, pero sen avisos activos.
En concreto, as zonas afectadas pola alerta laranxa son 33 concellos da Coruña: Ames, Aranga, Arzúa, A Baña, Boimorto, Boqueixón, Brión, A Capela, Coirós, Curtis, Frades, Irixoa, Melide, Mesía, Monfeo, Negreira, Ordes, Oroso, O Pino, As Pontes de García Rodríguez, Santa Comba, Santiago de Compostela, Santiso, Sobrado, As Somozas, Teo, Toques, Tordoia, Touro, Trazo, Val do Dubra, Vedra e Vilasantar. O aviso laranxa afecta outros 27 municipios en Lugo: Abadín, Begonte, Castroverde, Cospeito, Guitiriz, Láncara, Meira, Muras, Palas de Rei, O Páramo, Pol, Rábade, Sarria, Xermade, Antas de Ulla, Castro de Rei, O Corgo, Friol, Guntín, Lugo, Monterroso, Outeiro de Rei, Paradela, A Pastoriza, Portomarín, Riotorto e Vilalba.
Volta do anticiclón
A inestabilidade atmosférica continuará durante a xornada do mércores, coa chegada dunha fronte atlántica que deixará chuvias máis intensas e persistentes na metade norte. O anticiclón irá gañando terreo de cara ao xoves, cando colla forza e se espere unha circulación marcada do nordés. A situación durante o venres será semellante, con tempo seco e solleiro, e con temperaturas máximas que oscilarán entre os 20 e os 25 graos nas principais cidades galegas. Agárdase que as altas presións manteñan a súa influencia a partir do venres, con baixa probabilidade de precipitación e temperaturas propias desta época do ano.
