As chuvias serán as protagonistas durante a penúltima semana do ano en Galicia, que arrincou cun temporal de vento, choiva e ondada e que concluirá nunha fin de semana de festas do Nadal pasadas por auga.
Así figura nas predicións da Axencia Estatal de Meteoroloxía, que sitúa a Galicia como a única comunidade na que se esperan precipitacións para esta fin de semana do 24 e 25 de decembro, que coincide coa celebración da Noiteboa e do Nadal. O portavoz da AEMET, Rubén do Campo, sinala que dende o xoves as precipitacións restrinxiranse ao noroeste peninsular.
Dese modo, prevé que desde este xoves e o primeiro fin de semana das festas do Nadal as choivas afectarán a Galicia, sobre todo ao oeste da comunidade e a algúns puntos de Asturias e do oeste de Castela e León, especialmente en zonas montañosas.
En canto ás temperaturas, Do Campo prevé que o inicio da semana non terá xornadas moi frías para a época e apenas haberá xeadas, que se restrinxirán ás zonas de montaña. Os días serán “relativamente tépedos” e mesmo se alcanzarán ou superarán os 20 graos centígrados (ºC) na área mediterránea, sobre todo en Noiteboa e Nadal.
Nese sentido, o voceiro prognostica un inicio de festas do Nadal nin moi frío nin especialmente chuvioso, agás en Galicia, nin, por suposto, tampouco fará acto de presenza a neve.
Ao longo da semana formaranse bancos de néboa en amplas zonas do interior, sobre todo preto dos grandes ríos e en puntos das mesetas, bancos de néboa que nalgúns casos serán persistentes e, nesas zonas o ambiente será frío toda a xornada.
