Laurence. Ese é o nome da borrasca que entrou o domingo polo suroeste peninsular e que deixará abundantes chuvias en Andalucía, Estremadura, centro de España e Levante. Galicia esquivará o peor prognóstico deste sistema de baixas presións, que só provocará chuvascos ocasionais na mañá deste luns nas provincias do sur. O prato forte da semana virá a partir do xoves, cando un tren de frontes atlánticas asociado a unha borrasca localizada ao oeste de Lisboa cause temporal marítimo, refachos de ata 110 km/h e intensas chuvias. Non se prevén cambios ata o luns 24, con probabilidades de chuvia diarias de ata o 90%.
O radio de acción de Laurence está afastado de Galicia, polo que a súa influencia será feble e tan só provocará certa inestabilidade durante este luns e un ascenso moderado das temperaturas mínimas. Os ceos estarán cubertos na meirande parte do territorio e as precipitacións, máis probables durante a xornada de mañá, daranse sobre todo na zona sur de Galicia. A situación de inestabilidade continuará o martes, coa entrada dunha nova fronte que causará chuvascos illados pola tarde, sobre todo no interior.
Da transición ao temporal
Segundo o prognóstico da Axencia Estatal de Meteoroloxía (AEMET), o mércores será un día de transición entre dúas borrascas: Laurence e outro sistema de baixas presións que aínda non foi nomeado. Non obstante, agárdase que traia máis chuvias, sobre todo ao oeste peninsular. Tal e como prevé Meteogalicia, o mércores será unha xornada de tempo cambiante, con precipitacións que poden ser de intensidade moderada no sur e no oeste. As chuvias volverán coller forza na madrugada do xoves, coa entrada dunha fronte asociada á borrasca situada no Atlántico e que lle collerá o relevo a Laurence.
Diferentes servizos de meteoroloxía apuntan a un aumento da inestabilidade a partir do xoves. O prognóstico coincide co de Meteogalicia, que anuncia a influencia das baixas presións na recta final da semana, o que provocará abundantes precipitacións entre xoves e domingo. Dende o portal Meteored tamén prevén fortes ventos, de ata 110 km/h e temporal marítimo. O certo é que, segundo os primeiros avances, haberá probabilidade de chuvia do 90% ata, como mínimo, o vindeiro luns. As temperaturas serán moi suaves debido aos ventos do sur.
