O tempo estable e seco en Galicia despídese polo momento. Os récords de calor que se acadaron os primeiros nove días de outubro eran unha anomalía climática e, polo de agora, pode afirmarse dende o punto de vista climatolóxico que o clima outonal se inaugura este venres. Un río atmosférico afectará a toda a península e, segundo explican dende MeteoGalicia, todo o que non choveu nas últimas semanas virá “de golpe”. Segundo a Administración Nacional Oceánica e Atmosférica (NOAA polas súas siglas en inglés), os ríos atmosféricos son rexións relativamente longas e estreitas da atmosfera que transportan a maior parte do vapor de auga fóra dos trópicos. O que provocará que este venres as máximas se esborrallen ata sete graos e nalgúns puntos da comunidade se active a alerta por chuvia e vento.
A ausencia do bloqueo anticiclónico provoca que quede “aberta a porta” para o paso de sucesivas borrascas atlánticas. En primeiro lugar, a fronte de baixas presións que afecta este venres a Galicia se atopa cun aire moi cálido, arrastra humidade, e deixará unha xornada de intensas chuvias. Pola tarde, as precipitacións remiten no noroeste e choverá de maneira ocasional. Está activada a alerta amarela por chuvias na Coruña e Pontevedra e por ventos na Costa da Morte. Xa o sábado, a inestabilidade atmosférica tómase unha pausa dun día. Un anticiclón que entra polo noroeste dará cobertura a toda Galicia durante esta xornada, puidendo chover unicamente na Mariña, en Lugo. Será un día de vento do nordés, cun tempo seco e con tendencia á apertura de claros pola tarde.
O domingo volve un novo centro de borrascas que descargará chuvias pola tarde. As baixas presións entran polo oeste e deixarán unhas precipitacións máis xeneralizadas e persistentes. As temperaturas máximas oscilarán arredor dos vinte graos. Os termómetros de Ourense poderán marcar 23 graos e Vigo 22. Isto será o prólogo da vindeira semana, cando é posible a entrada un tren de borrascas. As altas presións situaranse sobre as Illas Británicas, máis ao norte. Isto bloqueará as baixas presións, o que fai dirixir as borrascas a Galicia de cara ao próximo luns.
A vindeira semana de outubro traerá un tren de borrascas á península
Sen dúbida, agárdase que a vindeira semana sexa de tempo moi revolto. O martes poderiamos atoparnos en baixas presións cos ceos cubertos como protagonistas. Ao longo da semana, é posible que sigan baixando progresivamente as temperaturas. Despois da xornada do sábado, marcha a calor de Galicia tras moitos días de estabilidade e de dúas fins de semana consecutivas por riba dos 30 graos. O río atmosférico despraza o tempo seco e cálido e inaugura, definitivamente, o clima outonal que caracteriza a Galicia.
