Os “veráns de sempre” están a cambiar en Galicia: a tendencia de temperatura está a subir, sobre todo no interior da comunidade e, en menor medida, na costa, cunha influencia baixa da calor nas Rías Baixas. Isto é o que amosa o gráfico publicado polo meteorólogo Benito Fuentes no seu perfil de X, onde demostra a evolución da estación estival durante o período 1940-2026. Pero os datos chaman especialmente a atención ao observar unha suba desigual nas estacións: “O quecemento é maior no inverno que no verán; Galicia e Murcia son as únicas zonas da península onde está a ocorrer”. Os datos dos gráficos proveñen do ERA5 do programa europeo de Copernicus, cunha actualización practicamente diaria.
Así, o meteorólogo explica que, se as temperaturas no inverno están a subir máis que no verán, quere dicir que o clima é menos extremo, pois a diferenza entre ambas as estacións é menor. “En xeral, en España, as temperaturas estanse a extremar cada vez máis; en Galicia sucede o contrario”. Isto non significa que os valores sexan máis suaves, senón que en inverno suben máis rápido que no verán, o que provoca unha tendencia máis compacta e reduce a distancia térmica.
Cuestión de perspectiva
Non obstante, Benito Fuentes explica que os datos son cuestión de perspectiva, xa que todo depende dos anos que se tomen como referencia nos gráficos. Por exemplo, se se emprega como base o período 1991-2020, obsérvase que os primeiros anos da serie histórica —dende 1940— teñen tonos azuis —máis fríos—, mentres que os últimos rexistrados están en vermello. Así, conforme avanza o tempo, predominan os veráns calurosos respecto do estándar actual —arredor dos 25ºC nas Rías Baixas, 30ºC no interior de Ourense e 20ºC na costa norte—. Con todo, cunha referencia entre 1951 e 1980, os veráns da actualidade son máis de 3ºC máis cálidos, porque os meses de xullo e agosto durante esa etapa eran moito máis fríos.
E como serán no futuro? “Estou seguro de que o cómputo dos vindeiros 30 anos será máis cálido aínda; os veráns de agora pintarémolos de azul porque, para entón, serán terribles”, subliña Benito Fuentes. Deste xeito, conclúe que “os veráns de toda a vida son, en realidade, os veráns de toda a túa vida“.
