Persoal investigador do Instituto Español de Oceanografía (IEO, CSIC), en colaboración co Instituto de Investigacións Mariñas (IIM-CSIC), as universidades de Málaga e Cádiz e outros organismos internacionais realizaron un estudo que demostra que os residuos plásticos, mesmo en pequenas cantidades, modifican a estrutura e o rendemento fisiolóxico do mexillón (Mytilus galloprovincialis), un organismo clave na costa galega.
A investigación, desenvolta no litoral de Galicia, mostra que a presenza de macroplásticos, concretamente películas de polietileno (similares a bolsas comerciais) e filamentos de nailon (sedela de pesca), pode modificar procesos fisiolóxicos clave e a estabilidade estrutural dos bancos de mexillón.
En particular, os tratamentos con alta concentración de filamentos de nailon provocaron unha redución significativa das taxas de respiración e filtración dos individuos, procesos esenciais para o seu metabolismo. Ademais, aínda que pequenas cantidades de plástico poden axudar a que os mexillóns formen estruturas máis complexas, unha acumulación excesiva conduce a unha perda de estabilidade, restrinxíndose a mobilidade dos mexillóns e a súa capacidade para formar estruturas tridimensionais cohesionadas. En comparación, as películas de polietileno mostraron efectos máis moderados sobre os parámetros analizados.
Mellora de xestión ambiental
“Os achados deste traballo subliñan a necesidade de incorporar os macroplásticos bentónicos na xestión e avaliación ambiental e de abordar a contaminación por plásticos desde unha perspectiva ecosistémica, que contemple non só a biodiversidade, senón tamén os procesos funcionais que sosteñen a estabilidade e produtividade dos ecosistemas costeiros”, sinala Eva Cacabelos, coautora do estudo e técnica no Centro Oceanográfico de Vigo do IEO-CSIC.
Este traballo enmárcase no programa internacional GAME (Global Approach by Modular Experiments), coordinado polo centro alemán GEOMAR Helmholtz Centre for Ocean Research Kiel. O programa en 2020 estivo dedicado a avaliar o impacto da contaminación plástica mariña sobre organismos bentónicos e procesos ecosistémicos asociados. A execución do experimento en Galicia foi acollida polo IIM-CSIC en Vigo, coa participación de Eva Cacabelos do IEO, José Fernández Babarro do IIM-CSIC e Ignacio Gestoso do Instituto Universitario de Investigación Mariña da Universidade de Cádiz (INMAR-UCA) como investigadores colaboradores.
Referencia: Entangled ecosystems: the impact of macroplastic litter on Mytilus galloprovincialis communities in northwestern Spain (Publicado en Frontiers in Marine Science)
