Ninguén o notou, agás a rede sísmica do Instituto Geográfico Nacional, pero esta mañá produciuse un dos maiores sismos dos últimos tres decenios no litoral próximo a Galicia. Ás 10.25, un terremoto de magnitude 4,5, segundo os datos provisionais, e a unha profundidade de 40 quilómetros, tivo lugar na zona próxima ao Banco de Galicia, un monte submarino situado a algo menos de 200 quilómetros do cabo Fisterra, non lonxe da zona onde repousan desde 2002 os restos do petroleiro Prestige.
Segundo o catálogo de terremotos do IGN, existen poucos sismos na zona con magnitude comparable ao deste venres, aínda que estes movementos poden formar parte da dinámica habitual en zonas con actividade tectónica, como é o caso do Banco de Galicia. Así, desde 1900 hai rexistrados máis de 100 sismos nesta rexión do Atlántico, pero apenas unha decena deles (entre o que está o desta mañá de venres) superaron a magnitude 4. Este xoves 7 de novembro houbo outro sismo, ao noroeste do principal do venres, que acadou unha magnitude 3,9.
Na madrugada do xoves houbo outro sismo na zona que acadou magnitude de 3,9
De feito, a orografía desta zona é produto da apertura do Atlántico que comezou hai uns 180-200 millóns de anos, e da aproximación máis recente das placas de África e Eurasia, que orixinou os Pireneos, a Cordilleira Cantábrica e, como prolongación, o Banco de Galicia. Aínda que estea baixo a auga, é unha elevación moi notable, xa que se achega a só 600 metros da superficie na súa máxima elevación, mentres que noutras zonas cae ata os 4.000 metros de profundidade.
En 2002, a raíz do afundimento do Prestige e os estudos realizados para valorar a posibilidade de que seguira vertendo fuel, realizáronse diversos estudos que achegaron un maior coñecemento da zona. Para garantir a súa preservación, foi declarada como Zona de Especial Conservación (ZEC), que abrangue unha superficie de 8.722 quilómetros cadrados.
