Xa están aquí as primeiras nevaradas do inverno. As principais precipitacións en forma de folerpas caeron, como é habitual, en Ancares, Trevinca, O Courel e o Macizo Central ourensán, onde a neve caeu durante varias horas tanto o xoves como o venres.
Tamén na serra do Xurés, e mesmo de forma puntual na serra do Faro, entre Pontevedra e Lugo. Xa en forma de sarabia, producíronse algúns episodios localizados no norte das provincias da Coruña e Lugo.
Unha masa de aire frío entrou en Galicia, deixando sarabia nas zonas do litoral e tamén en varias bisbarras do interior, mentres que nas montañas as nevaradas foron intensas e esta mañá apareceron cubertas de neve tanto nas serras dos Ancares e do Courel como puntos emblemáticos como O Cebreiro.
As temperaturas foron baixo cero en moitos puntos de montaña e os termómetros non superaron os 13 graos en ningún punto de Galicia.
A neve caeu por riba dos 800 metros e Meteogalicia activou o aviso amarelo por estas nevaradas, que superaron acumulacións de cinco centímetros.
