A metade sur da provincia de Lugo foi a zona de Galicia que concentrou o maior número de raios durante a tarde do pasado martes. En total, Meteogalicia contabilizou 401 descargas eléctricas dende o mediodía ata a medianoite, malia que o período de máis actividade comprendeu dende as 14 ata as 18 horas. O servizo meteorolóxico volve activar o aviso amarelo para este mércores por treboadas, que serán máis probables na provincia de Ourense, e no sur e na montaña de Lugo. As precipitacións poden caer en forma de sarabia.
Esta situación de inestabilidade débese á retirada do anticiclón das Azores, o que permite a entrada de baixas presións polo noroeste peninsular. Ademais, unha depresión illada en niveis altos (DINA) situada ao oeste de Galicia só contribúe a xerar máis inestabilidade, alimentada polo aire frío nas capas altas da atmosfera. Por iso, este mércores agárdanse ceos nubrados e treboadas. Con todo, as temperaturas experimentarán un moderado ascenso, sobre todo nas Rías Baixas, con valores por enriba dos 25 graos.
Segundo a Axencia Estatal de Meteoroloxía (AEMET), a DINA comezará a desprazarse cara ao sur de Portugal durante este mércores, ata situarse no golfo de Cádiz o xoves. Polo tanto, continuará o ambiente de inestabilidade e agárdanse precipitacións na provincia de Ourense e na ontaña de Lugo que poden volver ser tormentosas. As temperaturas divirarán Galicia en dous: con valores próximos aos 30 graos no sur mentres que no norte roldaranse os 22. No que respecta á fin de semana, todo apunta a que continuará a situación de inestabilidade.
