Galicia comeza a semana baixo a influencia das baixas presións e con temperaturas suaves que roldan os 19 graos nalgunhas provincias. Os ceos estarán cubertos os primeiros días, con chuvias máis probables na metade oeste. Unha fronte fría entrará o luns pola noite, deixando precipitacións que remitirán de cara o martes. As temperaturas descenderán progresivamente ata situarse en valores invernais. Con todo, a situación atmosférica cambia radicalmente o vindeiro xoves, que será unha xornada de transición para dar lugar ao tempo seco e solleiro, o predominante o que resta da semana.
Un anticiclón situado ao norte de África e unha borrasca ao suroeste de Irlanda deixará ceos cubertos e precipitacións débiles nos primeiros días. A pasada fin de semana a comunidade acadou uns valores térmicos altos derivados do ventos do sur, que traen aire cálido e humidade, unha situación que se repite este luns. Agárdase que na madrugada do martes as precipitacións sexan máis intensas en Pontevedra —onde está activa a alerta amarela— e sur da provincia da Coruña, segundo apunta MeteoGalicia. Nesta xornada notarase a baixada das temperaturas, especialmente nas mínimas, de maneira que algunhas cidades como Santiago amencerán con seis graos menos que o día anterior.
Dende o mediodía do martes predominarán as precipitacións, “ocasionalmente de carácter tormentoso”, explican dende MeteoGalicia. O mércores entrará o vento do nordés que deixará frío na comunidade e tamén inestabilidade atmosférica. Choverá de maneira xeneralizada e a cota de neve estará situada nos 1.200 metros. O día seguinte, o xoves, será a xornada de transición. Os ceos abrirán pola tarde e pode chover na zona norte de cara a noite. As temperaturas acadarán valores máis propios desta época. As máximas non superarán os 15 graos e as mínimas máis baixas van para Ourense e Lugo con 4 graos; en Pontevedra e Santiago os termómetros marcarán 5 graos; A Coruña chegará aos 10.
A partir do xoves, predominarán as altas presións en toda a comunidade e non choverá no que resta de semana. Poderá haber néboas matinais nalgunhas zonas do interior.
