Con máis de sete metros de lonxitude e un peso de entre cinco e dez toneladas, as baleas de aleta branca (Balaenoptera acutorostrata) son os rorcuais máis abundantes cerca das costas galegas. Agora, coñécese un pouco mellor a dieta destes maxestosos animais grazas a un estudo da Universidade de Aveiro que conta con participación galega. Os peixes son a presa principal e, concretamente, a xarda e a sardiña son as especies máis presentes na súa dieta. No caso das baleas atopadas en Portugal, o seu consumo baséase nas sardiñas e nos xurelos.
Estes mamíferos consomen un total de 67 quilogramos de comida diaria, segundo as estimacións. O estudo indica que nos últimos anos os rorcuais incrementaron o seu consumo de sardiña. Un dos principais motivos podería ser a recuperación dalgunhas poboacións na zona. En total, calcúlase que as baleas de aleta branca consomen ata 26.100 toneladas de sardiña ao ano. En xeral observouse que os machos teñen unha dieta máis diversa que as femias. Nalgúns deles apreciouse que comeron crustáceos, aínda que non é un consumo destacable.
A balea de aleta branca, en situación de vulnerabilidade
Este animal inxire, polo xeral, sardiñas dun tamaño similar ás que se consomen nas casas. É por iso que se podería establecer certo grado de competencia entre o sector pesqueiro e a alimentación dos rorcuais. Isto pode ser perigoso para a conservación desta especie. A poboación das baleas nestas augas é de ao redor duns 1.400 individuos e está en situación de vulnerabilidade. Ademais, isto súmase á captura accidental, causa de morte no 34% das ocasións en Galicia e nun 75% das veces en Portugal.
De cara a mellorar a situación desta especie, os investigadores destacan a necesidade de facer un seguimento e ter máis control da poboación de sardiña na península ibérica. As actividades pesqueiras deben ser sustentábeis coa preservación dos depredadores mariños, apuntan no informe. A alteración das dietas poden comprometer a condición física destes animais e provocar que substitúan as súas presas por outras de menor calidade nutricional.
Este é o primeiro estudo da dieta da balea de aleta branca neste área de distribución. Nel, participaron investigadores da Universidade de Aveiro, a Sociedade Portuguesa de Vida Selvagem, o Instituto de Conservación da Natureza de Portugal (ICNF), a Coordinadora para o Estudo dos Mamíferos Mariños (CEMMA), o Centro Oceanográfico de Vigo (IEO, CSIC) e o Instituto de Investigacións Mariñas (IIM, CSIC).
