O vindeiro 9 de maio cúmprense 12 anos da publicación no Diario Oficial de Galicia da norma que regulaba o Catálogo Galego de Especies Ameazadas. Dacordo á normativa comunitaria e española, a Consellería de Medio Ambiente da Xunta de Galicia elaborou a súa propia lista de especies vulnerables e en perigo de extinción para aumentar a súa protección. Nun principio eran 193, e en 2011 engadíronse sete máis.
Entre elas están, por exemplo, o mexillón e o caranguexo de río, a pita do monte (xa extinguida en Galicia), ou o oso pardo, ademais de decenas de especies de algas, liques, fentos, brións e plantas superiores, algunhas delas endémicas.
Para protexer a estas especies, a normativa contemplaba o desenvolvemento de plans de conservación (para que están na categoría de vulnerables) ou de recuperación (as que están en perigo de extinción). Para facer cumprir a normativa, por tanto, cada especie debería ter desenvolvido o su propio plan de protección. Contemplábase a posibilidade, con todo, de que algún grupo de taxóns puidera agruparse ao abeiro dun mesmo plan integral, de coexistir nun mesmo hábitat e requirir accións análogas de protección.
Pero case 12 anos despois da publicación do Catálogo Galego, o 98,5% das especies ameazadas en Galicia segue sen plan de protección. Ao ritmo actual, tal e como informaba GCiencia en febreiro de 2018, precisaríanse 1.782 anos, case 18 séculos, para que cada taxón tivera cadanseu plan. O último publicado, en 2014, foi o da píllara das dunas. Antes aprobaranse o da escribenta das canaveiras e o sapoconcho común (en 2013). Respecto ao oso pardo, o borrador da revisión do plan, aprobado en 1992, figura na web da Consellería de Medio Ambiente con data de 2013, sen que se teñan producido máis avances.
Hai case dous anos, o presidente da Xunta de Galicia anunciou a creación do Listado de especies silvestres en réxime de protección especial de Galicia. Feijoo subliñaba que o obxectivo da Xunta era conseguir ata 2020 a aprobación de 45 plans de protección. Desde entón, e aínda que se están elaborando borradores destes plans, ningún viu aínda a luz. GCiencia contactou en varias ocasións coa Consellería de Medio Ambiente, sen ter obtido resposta ata o momento.
Podes consultar aquí o Catálogo Galego de Especies Ameazadas.
