Marzo comeza en Galicia, pero non coa súa primavera climatolóxica, esa época na que se empeza a notar a fin do inverno e a chegada de temperaturas máis agradables. De feito, esta primeira fin de semana está cargada dos compoñentes da época invernal: moita chuvia, vento e neve. Unha profunda borrasca atlántica situada sobre Irlanda enviará unha fronte cálida durante o día e unha fronte fría na madrugada do sábado. Os ceos estarán cubertos os tres días, aínda que o venres e o sábado serán as xornadas con máis precipitación acumulada —poderán chegar aos 40 litros en 12 horas—. No mar a situación será moi complicada, este venres está activada a alerta laranxa: o temporal xa deixou ondas de 6 metros no litoral coruñés e ventos de 102,5 km/h en Viveiro (Lugo).
Na xornada do venres as precipitacións rexistraranse todo o día de maneira intermitente. A cota de neve estará situada nos 1.200 metros no sur, e os refachos serán máis potentes na costa e zonas altas. As temperaturas máximas xiran arredor dos 11 e 14 graos, e os valores mínimos rexistraranse en Lugo, con 2 graos. O sábado agárdase unha situación similar, aínda que as precipitacións poden vir acompañadas de sarabia e tormenta. Co avance do día, a cota de neve baixará ata os 900 metros pola noite. O patrón dos ventos mudará cara ao noroeste a partir do mediodía. Dende MeteoGalicia explican que esta é unha “fin de semana propia de marzo e de inverno” e que a situación aminorará de cara o domingo, cando non se espera tanta cantidade de chuvia.
A mesma borrasca moverase ata o oeste de Irlanda e enviará unha fronte fría que deixará un día de ceos anubrados e chuvias persistentes nas horas centrais do domingo. As temperaturas máximas soben minimamente e os ventos soprarán fortes no litoral. De cara a vindeira semana, as baixas presións dominarán a situación meteorolóxica, especialmente o luns. A partir do martes, Galicia atoparase nunha situación intermedia entre o anticiclón, que estará situado no interior da Península, e as borrascas atlánticas. MeteoGalicia informa que as temperaturas serán baixas para a época do ano. A partir do martes volverán as precipitacións.
A Axencia Estatal de Meteoroloxía (AEMET) informou nun comunicado que esta fin de semana tamén estará marcada, para a toda a península e Baleares, polo paso dun carrusel de frontes atlánticas. O inicio da semana do 4 ao 10 de marzo as frontes seguirán sendo as protagonistas en España, que traen precipitacións intensas e neve. A partir do martes, o anticiclón “gaña terreo”, e as precipitacións estarán limitadas ao extremo norte de maneira ocasional. Con todo, e facendo referencia á incertidume, as frontes atlánticas a partir do xoves volven afectar á península, de maneira que “non se descartan en ningún punto, nin en Baleares”.
