A meirande parte de Galicia desfruta nestes primeiros días de abril dun tempo primaveral, case máis propio do verán no sur, con temperaturas que poderían achegarse aos 30 grados o mércores en puntos de Pontevedra.
Moitos galegos contan os días para tomarse uns días de descanso a partir deste venres, cando comeza de forma oficiosa a Semana Santa. Pero a operación saída non será baixo o sol que loce a comezos de semana, senón que as viaxes faranse a remollo.
As predicións de cara á fin de semana apuntan a un escenario borrascoso e inestable en toda a península. E Galicia non será menos. Agárdase choivas desde o venres que se manterán nos días seguintes, cando menos, ata o luns.
A vertente atlántica será unha das zonas da península na que máis descargarán as nubes que avanzarán desde o sur-suroeste cara ao norte-nordés. Todo acompañado dun descenso xeneralizado das temperaturas, segundo a predición de Samuel Biener para Meteored.
Pero antes, agárdanse días solleiros en Galicia no comezo da semana. Os termómetros manteranse en niveis altos para esta época do ano. O día máis caloroso será o mércores. Ese día, Pontevedra podería ser, xunto a Sevilla e Badaxoz, un dos puntos máis quentes da península con case 30 graos.
Un ollo nos Azores
A partir do húmido arranque ábrese unha fiestra de grande incerteza sobre o tempo durante a Semana Santa. A día de hoxe, os meteorólogos non se atreven a predicir se os galegos poderán desfrutar do sol nas súas escapadas ou non deberán perder de ollo o paraugas.
Todo dependerá da posición final do anticiclón dos Azores. Se se aproxima máis ao arquipélago portugués, máis probabilidade de bo tempo en Galicia. Se queda lonxe, podería provocar a entrada sucesiva de frontes de oeste a leste. E Galicia sería un dos territorios peor parados con máis inestabilidade e maior probabilidade de choivas.
