Semana de contrastes en Galicia, que pasará dos 22 graos de máxima entre luns e mércores a sufrir un acusado descenso dos termómetros a partir do xoves. Este cambio atmosférico prodúcese pola retirada das altas presións cara ao sur das Azores, deixando a porta aberta ás borrascas atlánticas. A primeira delas enviará unha fronte fría a Galicia este xoves, cunha probabilidade de chuvia que acadará o 90% en todo o territorio. Dende Meteogalicia advirten que se producirá un acusado descenso das temperaturas, que non superarán os 13 graos de máxima. Isto prococará que algunhas precipitacións caian en forma de neve e incluso de sarabia. O panorama manterase inestable ao longo dunha fin de semana protagonizada polo frío e pola chuvia.
O ambiente primaveral persistirá en Galicia durante o luns e o martes, con temperaturas que chegarán a acadar os 23 graos en Ourense e non descenderán dos 20 de máxima en ningunha cidade galega. Con todo, o mércores será unha xornada de transición e as temperaturas comezarán a baixar progresivamente, situándose as máximas nunha media de 17 graos. O inverno regresará a Galicia o xoves, cando se prevé que unha potente borrasca atlántica envíe unha fronte fría que deixe abundantes precipitacións, pero tamén nevadas e ventos intensos. “Espérase un cambio radical de tempo cun temporal atlántico con ventos de compoñente norte”, explica o meteorólogo Francisco Martín León nun artigo publicado este luns no portal Meteored, onde sinala que as zonas máis afectadas serán precisamente a metade norte peninsular e as illas Baleares.
O tempo manterase inestable durante o venres, cando se agardan abundantes chuvascos en Galicia e un forte descenso das temperaturas. De feito, espérase que a fronte fría que entrou o xoves pola vertente atlántica vaia avanzando cara ao Mediterráneo, deixando ao seu paso ventos moi intensos en gran parte da península. Na fin de semana persistirá o tempo invernal e inestable e, de feito, Martín León prognostica que “outra poderosa borrasca atlántica podería agudizar o temporal invernal cunha nova entrada de norte-noroeste con máis precipitacións, ventos moi fortes, mala mar e nevadas, que se manterían para o domingo 25”.
As temperaturas máximas ao longo de toda a fin de semana estarán entre os 9 e os 13 graos, mentres que as mínimas se situarán entre os 6 e os 7. Segundo explica o meteorólogo Mario Picazo nun artigo publicado este luns no portal Eltiempo.es, o vento fará que “a sensación de frío sexa moito maior”. É de esperar, por tanto, que a sensación térmica estea por debaixo do que marquen os termómetros e a fin de semana estea marcada por chuvia abundante, con probabilidades de precipitación que acadan o 90%, e por valores invernais. Pese á incerteza, o escenario parece que se manterá inestable para a vindeira semana, segundo o prognóstico de Martín León. “O inverno seguirá connosco durante os últimos días de febreiro de 2024”, conclúe.
