Domingo, 19.27 horas. En Aguete, Marín, unha estela de cor branca rompe o atardecer do ceo. Tamén en Sanxenxo, Vigo, Ourense e en numerosos puntos do sur de Galicia e do norte de Portugal. “Todo apunta a que foi unha bóla de lume cunha traxectoria lixeiramente ascendente que deixou unha estela persistente”, explica o astrónomo Josep M. Trigo, coordinador da Rede de Investigación sobre Bólidos e Meteoritos (SPMN) do Instituto de Ciencias do Espazo (ICE-CSIC) e do Institut d’Estudis Espacials de Catalunya (IEEC). O experto cre que, segundo os datos preliminares, a bóla de lume produciuse pola entrada dun bólido que se desintegrou ao entrar na atmosfera e que tivo a súa orixe na constelación Pegaso. O fotógrafo Florencio Rodríguez, testemuña directa do fenómeno, asegura o seguinte: “Subiu do mar como unha liña brillante e despois comezou a ensancharse ata desintegrarse en pezas”.
Trigo e o seu equipo do SPMN están a analizar os vídeos, as fotografías e as observacións visuais directas para obter máis datos sobre o bólido. As imaxes coas que traballan dende a rede apuntan a un bólido “o suficientemente grande” como para xerar meteoritos. De todos modos, Trigo insiste en que se trata dunha hipótese e de que é preciso seguir recabando información para chegar a datos concluíntes. “Hai pouca información pero se se tiveran formado meteoritos, estes terían caído ao mar”, explica o astrónomo do ICE-CSIC. Ao parecer, aínda que o fenómeno se avistou perfectamente dende Galicia, ocorreu “moi lonxe da costa” e, en todo caso, o meteoro caeu sobre o Atlántico.
Ademais dos numerosos testemuños gráficos que se difundiron nas últimas horas do domingo e primeiras do luns a través das redes sociais, as cámaras que Meteogalicia ten instaladas en Aguete foron observadoras directas do fenómeno. A entidade publicou o vídeo onde se ve claramente como ás 19.27 horas aparece a primeira estela, que despois se distorsiona a causa do vento. “Este tipo de fenómenos deixan unha estela de 30 a 90 quilómetros de altura sobre o nivel do mar. Despois queda sometida ao efecto do vento en cizalla”, explica Trigo. A bóla de lume, que caeu ao oeste de Galicia, parece que se viu en todo o sur do país e no norte de Portugal.
A hipótese de que a bóla de lume se trate realmente dun meteoro é a que colle máis forza na mañá deste luns, despois de que se descartasen outras teorías. Ao principio tamén se barallou que puideron ser os restos do satélite ERS-2 pero a Axencia Espacial Europea (ESA) rexeitou esta hipótese dende a súa canle oficial na rede social X (antes Twitter). “Segundo as últimas informacións das que dispoñemos, o satélite segue intacto e a unha altitude duns 200 quilómetros. Non esperamos a reentrada e a ruptura ata dentro de un ou dous días”, apuntan fontes da axencia.