Un enorme bólido cruzou o ceo de Galicia o pasado sábado ás 22.09 horas. A espectacular bóla de lume procedía da chuvia de estrelas delta-leónidas e púidose ver fronte ás costas de Lugo e Luarca, en Asturias. “Comenzou a uns 100 quilómetros de altura e adentrouse no mar Cantábrico”, explica o astrónomo Josep M. Trigo, coordinador da Rede de Investigación de Bólidos e Meteoritos (SPMN-CSIC). Este bólido é o segundo en apenas dúas semanas, despois de que o domingo 17 de febreiro outra enorme bóla de lume causase expectación pola súa enorme estela, que se puido ver fundamentalmente no sur de Galicia e no norte de Portugal.
O bólido que se puido ver a pasada fin de semana “sorprendeu a decenas de observadores” fronte á costa de Lugo, segundo explica Trigo na canle de X (antes Twitter) da SPMN. Malia que o fenómeno tivo testemuñas directas da súa caída sobre o Cantábrico, a certificación visual achegouna a estación de Navianos de Valverde, situada en Zamora. Dirixida polo astrofotógrafo Miguel A. Furones, as cámaras captaron un vídeo de 11 segundos onde se aprecia claramente a aparición da bóla de lume e a súa progresiva desintegración.
Segundo a principal hipótese que baralla a SPMN, este último bólido procede das delta-leónidas, unha chuvia de estrelas cuxa actividade se estende dende mediados de febreiro ata as primeiras semanas de marzo. Amais de ser visto fronte ás costas de Galicia e Asturias, o rango de observación deste bólido incluíu seis comunidades autónomas máis, segundo confirman dende a SPMN: Andalucía, Aragón, Madrid, Valencia, Estremadura e Murcia.
