‘Picona’, ‘Famosa’ e ‘Luguesa’: as 16 variedades galegas de castaña que descoñecías

Empeza o outono e con el chegan as grandes protagonistas que nos enchen as mans nesta época: as castañas. Un froito que se obtén do castiñeiro e que medra no interior dunha cúpula de espiñas longas e ramificadas chamada ‘ourizo‘. As pugas, verdes ou marróns, cobren os chans dos nosos montes. A castaña galega é unha das máis valoradas a nivel mundial e ten unha longa tradición no país. De feito, pénsase que xa hai 12000 anos medraban nos bosques. Sabemos que o tamén chamado ‘bullote’ é un indispensable do período outono-inverno, precisamente polas múltiples maneiras de inxerilo e os valiosos nutrientes que aporta. Con todo, non é tarefa fácil distinguir todas as variedades que existen en Galicia. Hai ata 16 tipos que reciben nomes tan curiosos como ‘Picona’, ‘Famosa’, ‘Luguesa’, ‘De Parede’ ou ‘Puga de Afora’.

Toda esta información está recollida na Guía de cultivo do castiñeiro para a produción de castaña (2014) da enxeñeira Josefa Fernández López. No volume aparecen as variedades con máis importancia recoñecida nas diferentes zonas dos soutos galegos, como a ‘Amarelante‘, ‘De Parede‘, ‘Famosa‘, ‘Garrido‘, ‘Longal‘, ‘Negral‘, ‘Ventura‘ e ‘Judía‘. Os seus polinizadores, ‘Negral‘, ‘Rapada‘ e ‘Picón‘, foron elixidos para plantar nos novos soutos da zona amparada pola indicación xeográfica protexida Castaña de Galicia. Outras variedades tradicionais moi produtivas e con características moi valoradas son a ‘Raigona‘,  ‘Luguesa’, ‘Inxerta’, ‘Branca’, ‘Puga de Afora’, ‘De Presa’ e ‘Rubia’.

Publicidade

A castaña estimula o funcionamento do sistema nervioso

A comunidade galega acumula o 60% da produción nacional de castaña. É un froito seco característico do outono que ten un baixo aporte calórico, contendo graxas saudables e ácidos esenciais Omega 3 e 6 que protexen a saúde cardiovascular; conteñen os aminoácidos que o organismo necesita diariamente; estimulan o funcionamento do sistema nervioso polas vitaminas do grupo B; e fortalecen o sistema óseo polo fórforo e magnesio que conteñen. É un alimento saudable practicamente para calquera persoa e pódese conseguir facilmente, así como cociñar de moitas maneiras. Unha das formas preferidas dos galegos é ao forno, o que axuda tamén a quentar as mans nos días de frío.