Únete á nosa canle de Whatsapp
Varios concellos do noroeste de Galicia, como A Coruña, A Laracha, Oleiros ou Ferrol, decidiron pechar o acceso ao público en varias praias dos seus municipios despois de detectaren a presenza nos areais de moitos exemplares de carabela portuguesa (Physalia physalis), unha falsa medusa de picadura moi tóxica e tamén coñecida como fragata portuguesa, unha especie monotípica de hidrozoo sifonóforo da familia Physaliidae.
O venres, Oleiros foi o primeiro concello en pechar a praia de Bastiagueiro ao atopar carabelas portuguesas, polo que se procedeu a acordoar os accesos ao areal por parte da Policía Local. Tamén se instalaron carteis e cinta para acordoar e evitar así a entrada de cidadáns.
O Concello da Coruña anunciou este domingo o peche provisional de todos os areais da cidade tras detectar estas falsas medusas, que comezaron a ser retiradas “para preservar a seguridade da veciñanza, á que lle recomendamos non tocalas“, indicaron dende María Pita.
⚠️Desde Medio Ambiente informan de que, aínda que onte se recolleron das praias os restos das carabelas, a marexada volveu traer máis, sobre todo na praia de Riazor. pic.twitter.com/lPRyHC21DE
— Concello da Coruña (@ConcelloCoruna) January 3, 2021
Ferrol decidiu este luns pechar todos os seus areais, ao detectar que a invasión de carabelas portuguesas chegara tamén ás súas praias. E noutros municipios, como Carballo ou Malpica, tamén se rexistraron numerosos individuos.
https://twitter.com/carballo_gal/status/1346093486534254592
❗ Detectouse a presenza de exemplares de #carabelaportuguesa nas praias do Concello de Malpica, coma estes atopados na praia de Area Maior.
⚠ Pedimos aos veciños e veciñas que extremen as precaucións ao pasear polo areal. pic.twitter.com/6r3hJgBzGc
— Concello de Malpica (@MalpicaConcello) January 2, 2021
Con aparencia de medusa, a carabela é en realidade un organismo colonial cuxos individuos se especializan para manter viva a colonia. Trátase dunha agrupación de hidroides que se dividen o traballo: o neumatóforo (parte que flota), os gastrozoides (dixestión), dactilozoides (detección e captura de presas, e defensa) e os gonozoides (ocúpanse da reprodución).
Está formada por unha vela xelatinosa que lle permite percorrer os océanos impulsada polos ventos, as mareas e as correntes mariñas, mentres que do corpo central colgan numerosos tentáculos que lle serven para atrapar ás súas presas e que estendidos pode chegar a medir ata 50 metros, aínda que o máis común é que sexan duns 10 metros.
Estes tentáculos están provistos de cápsulas urticantes denominadas cnidocitos que poden paralizar a un peixe grande e afectar seriamente o ser humano. Estas cápsulas, ante o estímulo apropiado, liberan un filamento oco espiralado dun único uso chamado nematocisto, co que poden inxectar unha toxina proteica que paraliza á presa. Cando pican ao ser humano, provocan unha forte dor, mentres que están documentados casos de morte, en ocasións por unha reacción anafiláctica provocada polas defensas do propio individuo.
Estes hidrozoos non adoitan estar en latitudes tan ao Norte, pero son arrastrados polas correntes. De feito, a razón da súa presenza masiva nos areais de Galicia nestes días responde aos fortes temporais vividos nas últimas datas.
