O comité clínico que asesora á Xunta de Galicia sobre as medidas a tomar diante da evolución da pandemia da Covid-19 acordou este mediodía levantar os peches perimetrais vixentes en máis de medio cento de concellos para permitir as visitas familiares na festividade de Reis, este mércores 6 de xaneiro. Así, aínda que se manterá o confinamento nocturno (agás para os Reis Magos) na noite do 5 ao 6 de xaneiro, as visitas familiares estarán permitidas, mesmo nos concellos ‘perimetrados’, entre as 6 e as 23 horas deste mércores.
Foi unha das decisións do comité, que ademais rebaixou ao nivel básico as restricións nos concellos de Carnota e As Pontes, polo que se levanta neles o peche perimetral ante a mellora da situación epidemiolóxica neles, e baixar ao nivel medio ao concello de Narón, mentras que se manteñen os niveis actuais de restricións existentes a día de hoxe no resto dos concellos da comunidade. As medidas entrarán en vigor na medianoite do luns ao martes despois da súa publicación no Diario Oficial de Galicia.
👑 Galicia permitirá a mobilidade por visitas familiares o día 6 de xaneiro entre as 06,00 h e as 23,00 h
ℹ️ https://t.co/Fb6CYDECHy pic.twitter.com/YHJjGkM87C
— Xunta de Galicia (@Xunta) January 4, 2021
Alén destas medidas, e tras analizar a evolución epidemiolóxica no conxunto de concellos galegos, o comité clínico tamén acordou engadir ao listado de vixilancia especial aos concellos das comarcas da Coruña e Santiago de Compostela, onde preocupa o aumento de casos detectado nas últimas datas.
As cifras da pandemia empeoran en Galicia á espera de observar o impacto do Nadal
O mapa de restricións queda pendente, con todo, da xuntanza do grupo de expertos que se celebrará o vindeiro venres 8, xa que o comité, segundo expón a Consellería de Sanidade, acordou que é necesario agardar uns días para poder avaliar a evolución epidemiolóxica logo das medidas adoptadas polas festas do Nadal e fin de ano.
