Só tres días despois de que, en pleno mes de abril, os termómetros chegaran a superar os 30ºC en Galicia (30,2ºC en Ponteareas), as temperaturas descenderon ata uns niveis que provocaron a chegada de precipitacións en forma de neve, e non precisamente lonxe do municipio pontevedrés. A só uns quilómetros, nos montes que separan as provincias de Ourense e Pontevedra, no Suído, o Faro de Avión e Testeiro, a neve deixouse notar este martes.
As folerpas mesmo caeron con forza en zonas por debaixo dos 1.000 metros que amosaba a predición: no Deza ou na Serra do Careón, entre A Coruña e Lugo, en municipios como Melide, nevou esta mañá.
A situación mesmo podería repetirse e intensificarse nos vindeiros días, xa ás portas do mes de maio, segundo as predicións realizadas polos servizos meteorolóxicos. Ata o xoves Galicia permanecerá baixo a influencia das baixas presións con presenza de aire frío en altura, o que deixará precipitacións intensas, que poden ser de saraiba en cotas baixas e, a partir dos 1.000 metros, en forma de neve.
Aviso amarelo e laranxa
Ante esta situación, MeteoGalicia activou o aviso amarelo por ondas de ata 5 metros para o xoves en toda a costa atlántica. Pola súa parte, a Axencia Estatal de Meteoroloxía (Aemet) adiantou o aviso amarelo ao mércores por ventos de ata 80 quilómetros por hora en case toda Galicia (ver aquí detalles). Para o xoves, entre Arousa e Ribadeo elevarase o nivel a laranxa, segundo a Aemet, debido a unha predición de ondas de ata 6 metros.
