A influencia das altas presións situadas ao norte da península ibérica están provocando a ausencia de chuvia e as baixas temperaturas. Sen ir máis lonxe, no sur de Ourense está activado o aviso amarelo por minímas inferiores aos -4ºC. Lonxe de que se produza un cambio de tendencia, o frío seguirá sendo protagonista de cara aos próximos días. Unha masa de aire continental procedente do nordeste de Europa traerá esta semana un episodio de frío intenso que provocará, de novo, un descenso dos termómetros. De feito, en Lugo en Ourense espéranse temperaturas baixo cero.
Este descenso, tanto das mínimas como das máximas, tamén provocará que se rexistre neve en cotas baixas. Segundo eltiempo.es, no norte peninsular espérase que baixe ata os 300 ou 400 metros, debido a esa masa de aire continental que chega dende o nordeste europeo. Dende Meteogalicia confirman que nos comezos desta semana haberá ceos pouco anubrados e producirase un descenso das máximas. Xa de cara ao venres 10 espérase que a masa de aire frío procedente de Europa diminúa aínda máis as temperaturas e poida provocar precipitacións que serán “pouco importantes”.
Esta masa de aire frío continental estará impulsada por unha pequena baixa no Mediterráneo, segundo continúan explicando dende Meteogalicia. Iso provocará que de cara a este martes se esperen ceos máis anubrados e maior inestabilidade na fin do día. As temperaturas continúan descendendo, sobre todo nos valores máximos, e espérase algún chuvasco illado en forma de neve en cotas arredor dos 700 metros. Un escenario que se manterá estable o mércores, coa influencia das altas presións no leste de Europa. Galicia continúará con tempo seco o mércores e o xoves, que se pode rexistrar algunha néboa matinal. De cara á fin de semana, o prognóstico é semellante, pero é preciso esperar ante a incerteza das previsións meteorolóxicas a tantos días vista.
