A estrela RS Puppis está a uns 6.500 anos luz de distancia pero isto non é impedimento para vela en todo o seu esplendor e, sobre todo, para escoitala. Así o conseguiu o proxecto System Sounds da NASA, que forma parte dun proxecto de divulgación que mestura arte e ciencia. Escolleron unha imaxe desta espectacular estrela da Vía Láctea, tomada polo telescopio Hubble, e transcribiron a súa luz en son. Segundo explican no portal de noticias ScienceAlert, asignáronse un ton á dirección dende o centro da imaxe e volume ao brillo da luz.
Máis polo miúdo, RS Puppis é unha estrela cun brillo 15.000 veces maior que o do Sol. Cando o seu resplandor aumenta, envía un estalido de luz máis brillante cara ao po, posto que está rodeado deste tipo de material. Esta luz reflíctese no propio po, producindo un eco de luz. Isto, á súa vez, é o que fai que se formen rechamantes aneis prateados arredor do obxecto estelar.
Máis alá da utilidade divulgativa, converter datos visuais en auditivos fai que sexan máis accesibles para persoas con diferentes graos de discapacidade visual. Ademais, pode facilitar a comprensión de conceptos complexos a través de novas perspectivas.
