O ceo da península ibérica iluminouse na madrugada do pasado domingo polo paso dun bólido extraordinariamente brillante que tinguiu a noite de azul. Este impresionante fenómeno púidose ver dende distintos puntos de Galicia. Segundo as pesquisas do Instituto de Astronomía de Andalucía (IAA-CSIC), o bólido impactou contra as capas máis altas da atmosfera a unha velocidade de 161.000 quilómetros por hora. Pese ao sorprendente do suceso, rexistrado ás 00.46 horas, este tipo de fenómenos non son tan excepcionais como parece. Así o demostra un mapa interactivo do Centro de Estudos de Obxectos Próximos á Terra (CNEOS, polas súas siglas en inglés), que recompila todos os meteoritos detectados polos sensores da NASA que caeron no planeta dende 1988 ata a actualidade. O mapa actualizouse o 15 de maio, polo que aínda non figura o bólido desta pasada fin de semana.
Neste mapa interactivo, que contabiliza centos de meteoritos ao longo do mundo, non detectou que ningún caera sobre a península ibérica. Con todo, si rexistra tres que caeron sobre o Atlántico que circunda Galicia. Un deles, o de maior enerxía, impactou no océano o 9 de marzo de 2017 ás 4.16 horas. Os outros dous, situados máis ao norte e cunha enerxía considerablemente inferior, caeron o 3 de maio de 2018 ás 7.23 horas e o 26 de abril de 2023 ás 13.14 horas. Os meteoritos que reflicte o mapa clasificánse segundo tamaño e cor. De feito, salienta un gran punto vermello que se corresponde con meteorito especialmente enerxético que caeu sobre Rusia o 15 de febreiro de 2013 ás 3.20 horas.
Segundo explican dende o CNEOS, tan só se teñen en conta “as bólas de lume máis brillantes”, polo que non aparecen moitos bólidos detectados nos últimos anos sobre a península pero que, ou ben non foron detectados polos sensores da NASA, ou ben non cumpriron os requisitos para incorporarse a este mapa interactivo. A principal achega desta ferramenta é que ofrece información sobre a localización xeográfica, a data e a enerxía total do impacto, que aparece indicada no mapa co seu tamaño relativo e unha cor (canto máis vermella, máis potente). Con todo, o propio centro da NASA recalca que os datos non se proporcionan en tempo real, senón que se actualizan periodicamente, e tampouco se recolle información de todas as bólas de lume que se detectan ao redor do planeta.
En España, a Rede de Investigación sobre Bólidos e Meteoritos (SPMN, polas súas siglas en inglés), que depende do Instituto de Ciencias do Espazo (ICE-CSIC), encárgase de facer unha recompilación de todos os bólidos ou meteoritos que cruzan o ceo do país. Aínda que non dispoñen dun mapa interactivo como a NASA, si permiten consultar unha listaxe onde figuran todos os fenómenos detectados polas súas cámaras e polos seus colaboradores. De feito, xa figura como última entrada o bólido deste pasado fin de semana, considerando que “transformou o día en noite e deixou estela persistente”.
Podes acceder ao mapa interactivo da NASA clicando nesta ligazón.
