A terceira fin de semana de agosto estará marcada pola inestabilidade, con chuvias abundantes na parte occidental a partir do mediodía do venres. O sábado remitirán as precipitacións e Galicia transicionará cara á influencia anticiclónica. De feito, espérase que a partir deste domingo volvan ascender as temperaturas e se superen os 33 graos en varios puntos de Galicia, sobre todo na provincia de Ourense. A responsable, entre outros factores, será a entrada dunha masa de aire procedente do norte de África.”A calor intensificarase e estenderase á meirande parte do país. Será un novo episodio cálido, con temperaturas inusualmente altas para a época“, explican dende a Axencia Estatal de Meteoroloxía (AEMET).
De momento, nin este organismo nin Meteogalicia, o seu homólogo galego, falan de onda de calor. Porén, algúns expertos xa vaticinan que as temperaturas serán moito máis elevadas do que se espera. De feito, o doutor en Xeografía Física e investigador da Fundación para a Investigación do Clima (FIC), Dominic Royé, asegurou esta mañá na súa canle de Twitter que “Europa vivirá unha nova onda de calor especialmente grave e extrema en varios países, con condicións extremas en Francia e Italia”. O mapa no que se apoia o experto, anteriormente investigador da Universidade de Santiago (USC), indica que a meirande parte de Galicia estará en risco baixo dende o venres 18 ata o luns 21, agás unha franxa da Mariña lucense, que escalará ata o risco severo o sábado 19 e o domingo 20 de agosto.
Dende eltiempo.es, o meteorólogo Mario Picazo ofrece máis información sobre este “episodio cálido” que, de momento, non foi cualificado polos organismos competentes como “onda de calor”. Á espera de como se desenvolva o fenómeno, o experto explica que as altas presións seguen predominando en boa parte de España. Pese á borrasca que entra esta fin de semana e deixará chuvias, fundamentalmente en Galicia, os ceos despexados e o aire máis cálido que entra dende o norte de África serán a combinación perfecta para que “a calor sexa cada vez máis intensa”. Sobre todo, porque conseguirán debilitar a fronte situada nestes momentos ao noroeste de Galicia. O consecuente aumento das temperatuas notarase sobre todo nos primeiros días da vindeira semana.
