Galicia vén de rexistrar o mes de xuño máis cálido dende 1961, ano no que comezaron os rexistros. En concreto, O informe climatolóxico presentado esta mañá por Meteogalicia puxo énfase nas dúas ondas de calor que abafaron a comunidade o mes pasado e sinalou unha anomalía de temperatura de 2,6 graos. De feito, no que vai de 2026 xa se contabilizan 16 xornadas con avisos por altas temperaturas.
Segundo explicaron durante a rolda de prensa, xuño comezou con temperaturas “algo máis baixas” para a época do ano, pero os termómetros comezaron a subir de forma porgresiva. Así é que entre os días 11 e 14 e, despois, entre o 20 e o 24 rexistráronse dous importantes episodios de calor que deixaron temperaturas abafantes en Galicia. A primeira semana de xullo está a seguir a mesma tendencia, dado que xa se superaron os 40 graos nos últimos días en puntos de Ourense, Pontevedra e Lugo. A isto hai que sumar as noites tropicais, é dicir, que as temperaturas non baixen de 20 graos durante a madrugada.
En relación ás precipitacións, xuño foi un mes seco no que as chuvias foron “escasas e irregulares”, agás por algunhas treboadas no interior de Lugo. Neste contexto, a conselleira de Medio Ambiente e Cambio Climático, Ángeles Vázquez, subliñou que Santiago xa acadara os 40 graos en setembro de 2016 e que Ourense chegara aos 44no verán de 2022. Con todo, puxo énfase en que a evidencia científica apunta a que este tipo de fenómenos aparecen con maior frecuencia e, nalgúns casos, con maior intensidade.
