O domingo estivo marcado por unha forte actividade tormentosa que deixou 1.954 raios en Galicia en tan só 24 horas. Así o recollen os visores de Meteogalicia, que indican que as zonas máis afectadas —tamén polas chuvias intensas e a sarabia— foron a provincia de Lugo, o interior da Coruña e de Pontevedra e o norte de Ourense. Dende a Axencia Estatal de Meteoroloxía (AEMET) sinalan que en lugares como As Pontes chegáronse a rexistrar precipitacións de carácter torrencial, con acumulados de máis de 10 l/m2 en 10 minutos.
A actividade tormentosa do domingo está a ter continuación este luns, con chuvias xeneralizadas na meirande parte de Galicia. Ceos nubrados e temperaturas que non superarán os 20 graos está a ser o escenario do arranque semanal. Non obstante, Galicia pronto recuperará a influencia do anticiclón dos Azores, dado que este luns os chuvascos serán cada vez máis febles e remitirán de cara á noite. O martes xa predominarán as altas presións mais haberá certa inestabilidade atmosférica, polo que se prevén chuvascos pola tarde en zonas de interior e temperaturas sen grandes cambios.
O mércores comezarase a experimentar un lixeiro aumento dos termómetros, con Ourense acadando xa os 26 graos de máxima. O xoves haberá un escenario semellante, con temperaturas máis baixas nas cidades do norte, que non acadarán os 20 graos, e máis altas no sur, con ceos máis despexados e valores que roldarán os 24 graos. A partir do venres non se prevén chuvias pero os ventos de compoñente norte provocarán temperaturas baixas para esta época do ano.
