Nun contexto de emerxencia climática e niveis récord na concentración de CO2, redóbranse os esforzos entre a comunidade científica para buscar camiños cara á reducción de emisións de gases de efecto invernadoiro. Unha das ideas de vangarda parte desde Galicia, co proxecto Bac-To-Fuel, financiado con tres millóns de euros por parte do programa Horizonte 2020 da Unión Europea, que lidera o profesor da USC e investigador principal do grupo Nanomag Arturo López Quintela. O desafío é notable: desenvolver unha planta prototipo que producirá biocombustible avanzado, renovable e respectuoso co medio ambiente mediante o uso de bacterias xeneticamente melloradas a partir do uso de dióxido de carbono e hidróxeno.
Este proceso, segundo informa a USC, consta de dúas fases, que conforman unha “folla biónica”, imitando á fotosíntese. Este é un dispositivo que, mediante o uso de luz solar directa e o aproveitamento de augas residuais, consegue separar os elementos desta auga e producir hidróxeno renovable grazas ao uso de catalizadores formados por nanomateriais innovadores (Atomic Quantum Clústers, ou AQCs). Estes catalizadores subnanométricos poden lograr producións de hidróxeno a prezos competitivos ao permitir un proceso escalable e eficiente.
O hidróxeno renovable úsase posteriormente para alimentar as bacterias, que producen combustibles líquidos como resultado da reacción cunha corrente de dióxido de carbono, segundo se pode ver neste vídeo.
No segundo paso, o hidróxeno producido no paso anterior é alimentado nun biorreactor xunto con CO2 en bruto e bacterias modificadas xeneticamente mediante CRISP-CAS, para obter biocombustibles avanzados e adecuados ao sector do transporte.
“Este novo proceso, cando se implemente, podería favorecer que Europa se sitúe á cabeza mundial no competitivo mercado da produción de biocombustibles respectuosos co medio ambiente”, afirman dende o consorcio. O proxecto tamén inclúe un centro tecnolóxico belga (VITO), a spin-off da USC Nanogap, e as universidades de Lancaster (Reino Unido), Wageningen (Holanda) e a Universidade Técnica de Berlín (Alemaña).
Descarbonización do transporte
Tal e como explican os impulsores do proxecto, a produción dos biocombustibles vai xogar un papel clave para acadar os obxectivos de desenvolvemento sostible para o ano 2030. Neste sentido, o consumo deste tipo de combustibles deberá triplicarse, chegando a un 10% da demanda mundial dos carburantes de transporte, e que na actualidade está arredor do 3%.
Así, produtos como os que busca desenvolver Bac-To-Fuel irán substituíndo de forma progresiva aos combustibles fósiles líquidos, en particular naqueles modos de transporte que non poden electrificarse aínda. A produción e o uso de biocombustibles pode proporcionar beneficios tales como unha maior seguridade enerxética, a redución da dependencia das importacións de petróleo e a redución da volatilidade dos prezos do petróleo.
Ademais, os biocombustibles de nova xeración tamén poden apoiar o desenvolvemento económico mediante a creación de novas fontes de ingresos. Espérase que o consumo convencional e avanzado de bioetanol e biodiésel aumente en toda a Unión Europea, impulsado polo aumento das taxas de incorporación prevista por cada estado membro, sinalan dende o consorcio.
Esperançador objectivo, brilhantes perspectivas do programa de investigaçom !