Un grupo de científicos do Centro de Investigación en Nanomateriais e Biomedicina (Cinbio) da Universidade de Vigo traballa nun proxecto para producir metanol, un composto químico pouco contaminante que se pode empregar de maneira sinxela e eficiente como unha alternativa aos combutibles fósiles.
“O compoñente innovador que ten este proxecto é que desenvolvemos un catalizador que utilizando só a luz solar é capaz de transformar o CO2 en metanol”, explica Miguel Correa, líder do grupo TeamNanotech do Cinbio. “Ademais, facémolo co mellor rendemento que se conseguiu ata o momento”, engade.
O proceso, explica o equipo, é moi sinxelo. Consiste en introducir o catalizador dentro da auga e pasar o CO2 por esa disolución. A continuación, irrádiase coa luz solar. Simplemente con ese proceso, o dióxido de carbono transfórmase na superficie do catalizador, e na auga queda o metanol.
Con todo, esta non é a única innovación do proxecto, xa que o catalizador do equipo de Correa ten outra novidade que o fai aínda máis efectivo. “Dentro deles hai unha nanopartícula de ouro. Esta é unha das razóns de que aumente a acticidade do catalizador porque interacciona dun xeito máis eficiente coa luz solar”, conclúe Correa.
