Mollaranse esta semana os peliqueiros, os boteiros ou os xenerais do Ulla? Galicia achégase ao días grandes do seu Entroido e o tempo semella que permitirá desfrutar das festas programadas para as seguintes xornadas. Após unha fronte fría moi activa que deixará precipitacións intensas durante este luns, agárdase que a “tendencia anticiclónica deixe unha baixa probabilidade de chuvias e unas temperaturas agradables” de cara ao final da semana e comezos da próxima, segundo indican fontes de Meteogalicia.
Este luns 24 de febreiro Galicia vivirá unha xornada de avisos amarelos e laranxas debido ao paso dunha fronte fría moi activa de oeste a leste. A provincia da Coruña e o interior de Pontevedra teñen activada unha alerta amarela por chuvias que poderían acumular máis de 40 litros por m2 en 12 horas. Do mesmo xeito, o litoral galego —a excepción da Mariña lucense— vivirá unha xornada “complicada” con ondas que poderán superar os cinco metros de altura e ventos que alcanzarán máis de 60 quilómetros por hora.
Influencia anticiclónica
De cara ao martes, unha vez pasada a fronte fría, a comunidade rexistrará algúns chuvascos ocasionais, “máis probables na metade oeste” que irán remitindo co avance da xornada. As temperaturas baixarán lixeiramente, manténdose as máximas ao redor dos 15 grados en Pontevedra ou Ferrol, mentres que as mínimas oscilarán entre os 3 grados de Lugo e os 7 da Coruña.
Resumo desta vindeira semana:
— MeteoGalicia (@MeteoGalicia) February 23, 2025
▪️ Luns: precipitacións🌧️con ondas de 5 a 6m🌊
▪️ Martes: chuvascos ocasionais🌦️e temp📉
▪️ Mércores: tempo seco con ceos🌤️
▪️ Xoves e venres: chuvascos🌦️ pic.twitter.com/y7tEkFnPnF
Segundo detalla Meteogalicia, a partir deste día a probabilidade de precipitacións é baixa, mais agárdanse algúns chuvascos de cara ao xoves. Ademais, prevese que se “recupere progresivamente a influencia anticiclónica de cara á fin de semana e os primeiros días da próxima“, polo que as temperaturas serán agradables durante o día, especialmente nas horas centrais, pero baixas durante a noite.
Os termómetros de cara á fin de semana, segundo a predición de Meteogalicia, ascenderán ata os 15 graos en Vigo, A Coruña e Ourense, mentres que en Santiago e Lugo as temperaturas serán algo máis baixas. Pola contra, as mínimas esperánse que oscilen entre os 3 grados de Ourense e os 7 de Ferrol.
