Agosto comeza con temperaturas en descenso en Galicia. Así, a península será o obxectivo de tres vaguadas, zonas de baixas presións que propiciarán unha entrada do aire frío e o desenvolvemento de fortes tormentas. Segundo anuncia MeteoGalicia a través do seu perfil de X, a chuvia rexistrada nas primeiras horas do luns 3 de agosto na comunidade están asociadas a unha fronte cálida que marcha de Galicia polo norte de Lugo. Con todo, aínda que a mañá sexa seca, pola tarde os protagonistas serán os chuvascos asociados a unha fronte fría moi pouco activa.
A previsión da axencia meteorolóxica galega apunta a ceos nubrados e unha baixada térmica, cunha probabilidade de chuvia superior ao 50% na Coruña, Ferrol e Lugo que se manterá ata o xoves. Pola contra, nas Rías Baixas estas cifras descenden ata o 5% e as temperaturas serán máis estables cara á fin de semana, acadando ata 30ºC en Pontevedra e Vigo.
Pese a esta tendencia, a Axencia Estatal de Meteoroloxía anuncia que existe un perigo extremo de incendios en boa parte da península. O risco é elevado na metade leste da comunidade, sobre todo en determinados puntos do interior da provincia de Ourense e o sur de Lugo.
