Unha fronte situada no suroeste da península ibérica está a intensificar a circulación de vento do sur, tamén impulsado polas altas presións que dominan o continente europeo. Estes dous fenómenos favorecen a circulación de calixe —é dicir, dunha masa de aire con po africano en suspensión— que chega este martes a Galicia. Así o trasladan fontes de Meteogalicia, que confirman que o eixe atlántico é o máis afectado. De todas formas, este episodio de po sahariano será breve e remitirá mañá. Ademais, os modelos non prevén unha alta concentración de partículas. Dende logo, segundo informan dende o servizo meteorolóxico galego, nada comparable á calixe rexistrada en marzo de 2022.
“Non será tan intenso como o episodio que vivimos o ano pasado”, confirman fontes de Meteogalicia. Tamén informan de que este mércores cambia a situación, chega un anticiclón e a circulación do vento cambia, con predominancia do nordés. Dende o departamento de Calidade do Aire aseguran que o episodio actual non é “nada comparable” ao de marzo de 2022. “Aquel foi terrible, con medias diarias de máis de 500 microgramos por metro cúbido. De feito, pensabamos que se nos estragaran os analizadores”, lembra Nuria Gallego, investigadora deste departamento. Para este episodio é preciso esperar ao final do día para saber como queda a media diaria. De momento, o valor máis algo é de 91 microgramos por metro cúbico, pero é un dato horario e, por tanto, puntual.
O episodio actual non é “nada comparable” ao de marzo de 2022
Unha das mellores probas para certificar a chegada deste po africano son os rexistros das estacións meteorolóxicas. Hai sete en Galicia que están dando mala calidade do aire, cunha especial afectación no eixe atlántico, aínda que tamén están a notificar valores elevados de partículas en Ourense e Lugo. “Cando vemos en varias estacións afastadas e ao mesmo tempo este patrón, a causa principal é de po sahariano. Ademais, temos unha predición que nos indica que debemos estar atentos a iso”, apunta Gallego. De todas formas, entenden que esta mala calidade do aire “é algo puntual” que non debería continuar mañá. Ademais, hai outras circunstancias que están empeorando a calidade do aire. Segundo traslada Gallego, levamos moitos días de anticiclón, con moito frío e acendidos da calefacción, así como queimas e tráfico. “Eses valores altos con un pouco por acumulación”, engade.
Cal é a repercusión na saúde?
A calixe pode ter repercusións sobre a saúde, segundo confirman dende a Consellería de Medio Ambiente. Para iso, guíanse por un código de cores que se pode consultar no apartado de Calidade do Aire de Meteogalicia e que vén establecido por uns sudos elaborados pola Organiación Mundial da Saúde (OMS), que se poden aplicar á Unión Europea, España e Galicia. A cor vermella, rexistrada en sete estacións galegas, xa marca unha mala calidade do aire. “Os grupos de risco poden experimentar efectos na saúde e deberían evitar actividades activas e prolongadas ao aire libre. A poboación en xeral pode seguir as mesmas recomendacións, pero se non ten un problema de saúde previo, non debería de haber problema”, di Gallego. Que conclúe da mesma maneira e apelando ao sentido común: “Sé prudente”.
