Únete á nosa canle de Whatsapp
A Sociedade Galega de Historia Natural (SGHN) anunciou este venres que a Fiscalía de Medio Ambiente de Galicia admitiu parcialmente unha denuncia presentada pola entidade a finais do mes de outubro de 2019 debido ás presuntas irregularidades nunhas obras realizadas na contorna de Estaca de Bares.
Naquel momento, a asociación ecoloxista cualificou de “abano de desfeitas” a intervención realizada do marco de “obras de acondicionamento” do faro e o espazo de acceso, que formarían parte “dun plan de promoción turística na Estaca de Bares, promovido pola Axencia de Turismo de Galicia e/ou o Concello de Mañón“.
As actuacións causaron, segundo comprobou a entidade,”unha deterioración grave, permanente e de moi difícil recuperación sobre os hábitats de interese comunitario da ZEC Estaca de Bares, e sobre as poboacións de especies de flora e fauna silvestres dependentes destes, que supoñen en conxunto un grave desequilibrio ecolóxico”.
A Fiscalía acordou abrir dilixencias de investigación penal por varios feitos: a limpeza mecanizada duns 30.000 metros de hábitats de interese comunitario, que xa fora denunciado pola SGHN en xuño de 2017 diante da Dirección Xeral do Patrimonio Natural; a construción dun miradoiro-aparcamento na zona A da ZEC Estaca de Bares; as actuacións na antiga base militar e no humidal existente, que alteraron a súa estrutura e funcionamento ecolóxico e a distribución dos hábitats; e a degradación de hábitats debido ás obras acometidas para acoller a chegada da Vuelta Ciclista a España en setembro de 2018, así como o uso “ilegal” de megafonía, que tamén denunciara a SGHN no seu momento.
Entre os danos causados, a SGHN “constatou a artificialización e perda de hábitats e poboacións de especies silvestres de flora e fauna nunha área de máis de 400 metros cadrados na parte superior do cantil, que mantiña unha serie de charcas temporais que servían de refuxio a distintas especies de invertebrados e anfibios”. Nesta zona, alén da existencia previa dun aparcadoiro “alegal” que incumpría a normativa, destruíronse hábitats protexidos, entre os que hai taxóns endémicos como Angelica pachycarpa e Ulex europaeus L. subsp. latebracteatus.
