O tempo para a ponte do Pilar está pendente dun pequeno ciclón que dende hai semanas vaga polo océano Atlántico, subindo e baixando de categoría e sen tomar un rumbo fixo. Trátase de Leslie, que actualmente é unha tormenta tropical aínda que podería transformarse en furacán dependendo das zonas que transite e do seu encontro con diversas masas de aire.
A Axencia Estatal de Meterología (Aemet) xa expresou esta fin de semana que o tempo para esta fin de semana vai depender moito de Leslie, que podería tocar Canarias e entrar na Península por Cádiz, aínda que tamén existe a posibilidade de que ascenda cara ao nordeste e chegue preto das costas de Galicia.
O Centro Nacional de Furacáns en Miami (Florida) dixo o domingo nun parte que a tormenta tropical Leslie xa non se dirixe ás Azores, como estaba previsto. Pero onte luns as condicións cambiaron e a tormenta tropical avanza cara ao Leste do Atlántico. De chegar preto de Galicia, Leslie viría acompañada de fortes ventos, choivas intensas e grandes ondadas.
A Axencia Estatal de Meteoroloxía emitiu un parte recoñecendo que “existe unha elevada incerteza na predición para o domingo debido á presenza sobre o Atlántico do ciclón tropical “Leslie”, catalogado como tormenta tropical polo CNH (Centro Nacional de Furacáns de Florida, responsable da predición deste tipo de ciclóns sobre o Atlántico)”. Aínda non se sabe se o ciclón podería dirxirse “aos arredores de Canarias, fronte ás costas de Marrocos ou mesmo sobre a Península”. E recoñecen que a diversidade de escenarios fai complicada unha predición.
De calquera xeito, á marxe da ruta de Leslie, a inestabilidade atmosférica vai chegar a Galicia nas vindeiras horas. Para este mércores está previsto un novo fronte de choiva, con precipitacións intensas durante a madrugada. E o venres esperamos outra borrasca. Pero a predición a medio prazo segue pendente das evolucións do ciclón Leslie.
