A enxeñeira Cecilia Alonso, graduada en Enxeñaría de Montes polo Campus Terra da USC e investigadora do grupo de investigación Unidade de Xestión Forestal Sostible (UXFS), acaba de ser distinguida cun accésit na última convocatoria dos Premios Universitarios Sociedade Española de Ciencias Forestais (SECF) ao mellor Traballo Fin de Máster Oficial por un estudo sobre os grandes lumes forestais rexistrados entre 2016 e 2016 no distrito forestal Verín-Viana.
O traballo de fin de máster realizado pola enxeñeira galega, dirixido polos profesores da EPS de Enxeñaría de Lugo Ana Daría Ruiz González e Stéfano Arellano Pérez, desenvólvese baixo o título ‘ Avaliación e cartografado da severidade dos grandes lumes ocorridos no distrito forestal XIV (Verín-Viana) entre 2006 e 2016’, unha investigación na que a autora analizou e estudou a severidade do lume cos índices de teledetección dNBR e RdNBR de 36 incendios forestais de máis de 200 hectáreas coas imaxes do satélite Landsat.
A investigadora estudou mediante imaxes por satélite a severidade de 36 grandes incendios forestais
O xurado encargado de fallar a última edición dos premios universitarios a través dos que a SECF pretende promover o estudo e o progreso das ciencias e técnicas forestais entre os novos investigadores, estivo presidido pola doutora Marta Pardos Mínguez. A catedrática do departamento de Produción Vexetal da USC e Rosa Mosquera Losada tamén formou parte do tribunal encargado de avaliar as preto de medio centenar de candidaturas presentadas a concurso.
Os doutores Juan Carlos Giménez Fernández, José María Climent Maldonado, Eduardo Tolosana Esteban e Juan Picos Martín completaron a nómina de integrantes do xurado dos Premios Universitarios SECF 2017, do que actuou como secretaria Míriam Piqué. A orixinalidade da temática, a metodoloxía de traballo aplicada, a relevancia dos resultados obtidos, o interese e grao de aplicación práctica, ademais da achega persoal na presentación das candidaturas e a súa calidade foron os criterios empregados polo tribunal á hora de emitir o seu fallo.
