Cada ano, a Unidade de Patoloxía do Instituto Tecnolóxico para o Control do Medio Mariño de Galicia (Intecmar) publica o Informe Epidemiolóxico de Moluscos Bivalvos de Galicia. O último documento revela que a Marteilia cochinillia, o principal patóxeno que afecta ao berberecho galego dende 2012, continúa a provocar episodios de mortalidade anormal. Así o compartía o presidente da Xunta, Alfonso Rueda, na súa comparecencia do pasado luns.
O informe analiza o estado sanitario dos moluscos bivalvos comerciais nas zonas de produción galegas e recolle os resultados do traballo desenvolvido durante o anterior exercicio mediante diversos puntos de mostraxe e da análise. As conclusións vinculan este parasito cunha mortalidade elevada e inusual nas poboacións de berberecho.
Segundo informa a Xunta, os polígonos das bateas da ría de Muros-Noia, a marxe sur da ría de Pontevedra e a ría de Aldán mantéñense libres da Marteilia frigens. Trátase dun parasito coñecido a nivel europeo, causante da enfermidade chamada marteiliose, que afecta a diferentes especies de moluscos bivalbos.
A situación da ameixa
No caso das mostras de ameixa, non se detectaron exemplares afectados polo parasito Perkins olseni na ría de Muros-Noia. A Xunta sinala que, aínda que a presenza deste parasito non pon en risco a saúde dos exemplares, constitúe un potencial axente de risco se se dan condicións favorables para a súa multiplicación.
