O Grupo de Estudos do Medio Mariño (GEMM) vén de atopar unha nova especie para a ciencia. Trátase dun verme plano, atopado en aguas da ría de Arousa “e que ademais, dadas as súas características especiais que a diferencian dos seus parentes próximas, deu lugar á creación dun novo xénero”, segundo concreta este grupo investigador.
O novo animal, bautizado como Laqueusplana bocki, é un verme plano que pode alcanzar unha lonxitude en movemento de 25 milímetros. O seu corpo, de forma alongada e consistencia carnosa, presenta unha parte anterior amplamente redondeada que se vai estreitando cara ao final.
Segundo explica a entidade, non presenta tentáculos e ten dous tipos diferentes de ollos. “O seu corpo é de cor beige pálido con manchas marróns escuras distribuídas uniformemente”, segundo engade o GEMM. O nome da especie fai honra a Sixten Bock, experto zoólogo sueco. O traballo foi publicado en ‘European Journal of Taxonomy‘ e supón, segundo destaca o GEMM, “unha continuación do intenso traballo de catalogación da fauna mariña que o GEMM leva realizando desde fai sete anos en colaboración con diversas institucións de gran relevancia científica”.
Os investigadores colaboraron neste estudo co Museo de Ciencias Naturais de Madrid. Por iso, o GEMM informa da posta en marcha dun novo proxecto no que se ofrecerá a posibilidade de apadriñar a un animal mariño. Con esta iniciativa este grupo pretende conseguir o apoio económico necesario “para seguir adiante co importante labor que realiza, ofrecendo a posibilidade a calquera persoa ou entidade privada, de contribuír economicamente a unha investigación concreta”.
“Haberá a posibilidade de asociar o nome do padriño a todos os documentos xerados na investigación, ata mesmo poder dar nome a unha nova especie”, segundo explicaron.
