O Instituto Portugués do Mar e da Atmosfera (IPMA), o equivalente luso á Axencia Estatal de Meteoroloxía (AEMET) en España, acaba de nomear unha nova borrasca: Regina. Está situada no suroeste do país veciño e conforme pasen as horas irase desprazando polo norte de Marrocos e polo Mediterráneo, polo que os seus efectos en Galicia serán febles e de breve duración. Non obstante, a semana estará marcada por un tempo cambiante que irá dende os 22 graos de máxima nalgunhas cidades galegas entre martes e mércores ata unha alta probabilidade de chuvia e treboadas a partir do xoves. Amais da borrasca Regina, detrás destes cambios de tempo están un corredor de ventos do norte e unha valgada que se achegará dende o Atlántico.
Chuvias… por pouco tempo
Regina provocará unha profunda inestabilidade en Andalucía e no Levante nos primeiros días da semana. En Galicia, os seus efectos só se deixarán sentir o luns e na madrugada do martes, cando se prevén chuvascos localmente fortes, sobre todo na fachada atlántica. A responsable das precipitacións será unha fronte fría asociada a Regina, pero de breve duración. Segundo o prognóstico de Meteogalicia, a previsión para o martes é que se recupere o tempo solleiro, sobre todo pola tarde.
Volta ao tempo estable
Entre martes e mércores, Galicia estará nunha situación intermedia entre a borrasca Regina e o anticiclón dos Azores, o que propiciará a apertura dun corredor de ventos do nordés. Isto traducirase en ceos nubrados no norte e despezados no sur. E aínda que non se pode descartar algún chuvasco illado, en xeral será un día de estabilidade. Un dos elementos máis salientables da xornada será o considerable aumento das temperaturas, que poden acadar máximas de 22 graos nas cidades de Pontevedra, Vigo e Ourense. Do resto de urbes, só A Coruña estará por debaixo dos 20 graos.
O mércores volverá ser un día de estabilidade, con ceos despexados e temperaturas agradables que superarán de novo os 22 graos de máxima. O cambio chegará a partir do xoves, cando volvan aumentar as probabilidades de precipitación. As chuvias estenderanse por toda Galicia na segunda metade do día e estarán ocasionadas por unha valgada que se achegará dende o Atlántico. É dicir, unha configuración atmosférica que propiciará de novo tempo inestable, precipitacións e brusco descenso das temperaturas.
A fin de semana, segundo o prognóstico de Meteogalicia, tamén continuará cunha dinámica de tempo cambiante debido á posición intermedia de Galicia entre as altas e as baixas presións. Dende o servizo meteorolóxico galego engaden que haberá “sucesivos desprendementos de aire frío en altura aumentando puntualmente a inestabilidade”.
